Kooxaha mucaaradka ee ka hawl-gala gudaha dalka Itoobiya ayaa lagu soo warramayaa in ay soo rideen diyaarad millateri oo nooceedu yahay kuwa qummaatiga u kaca ee loo yaqaan Helicopterka oo ay lahaayeen ciidanka dowladda Xabashida Itoobiya.
Sida ayay wararku tibaaxayaan diyaaraddan ayaa Axaddii lasoo dhaafay kusoo dhacday deggaan dhaca gobolka Amxaarada kadib markii ay toogteen maleeshiyaadka Fano, sida ay sheegeen ilo-wareedyo ay soo xigatay warbaahinta maxalliga ah ee Ethio Focus.
Diyaaraddan oo si gaar ah ugu dhacday deggaanka Debresina ee degmada Dembia ee duleedka magaalada Gonder ayaa la sheegayaa in safarkeedu uu ku jihaysnaa magaalada Gorgora oo ku taalla dhinaca waqooyi ee harada Taana.
Ilo deggaanka ah ayaa warbaahinta u sheegay in ay maqleen qarax aad u xooggan. Waxaanay wararku sheegayaan in diyaaraddu ay sidday saraakiil ka tirsan dowladda Xabashida Itoobiya, inkastoo magacyadooda aan lasoo bandhigin.
Mas’uuliyiin ka tirsan is-maamulka Amxaarada ee daba-dhilifka u ah maamulka Abiy Axmed ayaa xaqiijiyey dhacdadaasi, inkastoo ay ku tilmaameen inuu ahaa shil fudud oo uu sababay mid ka mida baalasha diyaaradda uu ku dhacay geed.
Ilaa haatan khasaaraha dhacdadan si madax-bannaan looma xaqiijin, iyadoo dhinaca dowladda Saliibiyada Xabashida Itoobiyana aanay ilaa hadda faahfaahin dheeraad ah ka bixin heerka uu gaarsiisan yahay khasaaraha ka dhashay burburka diyaaraddaasi.
About The Author
