Inta la xaqiijiyay ugu yaraan 80 qof oo Falastiiniyiin ah ayaa tan iyo saaka oo kaliya ku shahiiday gudaha Marinka Gaza kaddib markii ay la kulmeeen weeraro uga yimid dhanka ciidanka gumeystaha Yahuudda.
Dadka rayidka ah ee Yahuuddu xasuuqa kula kacday ayaa 56 ka mida waxaa lagu sheegay inay ahaayeen gargaar sugayeyaal, kuna sugnaa mandiqadda Natasrim ee kutaal bartamaha jiidda Gaza iyo magaalada Rafax ee dhacda dhanka koonfurta.
Ciidanka Yahuuddu waxay sidoo kale si gaar ah u beegsadeen dad badan oo isugu soo baxay xarun gargaarka oo kutaalla mandiqadda Al-Shaakuush ee dhacda waqooyiga Rafax, waxayna ciidamada gumeystuhu rassaas ku fureen boqollaal qof oo Falastiiniyiin ah oo safaf ugu jiray gargaar, waxayna taasi sababtay dhimasho iyo dhaawacyo badan.
Qaar ka mid ah dhaawacyada halista ah ayaa loo qaaday cisbitaalka Naasir ee kuyaal Khan Younis, iyo xarumo ku-meel-gaar ah oo ku yaal Al-Mawaasi oo dhacda koonfurta Gaza.
Waaxda caafimaadka ee Gaza warbixin ay soo saartay waxay ku sheegtay in 24-kii saac ee la soo dhaafay cisbitaalada marinka Gaza lasoo gaarsiiyay 79 qof oo shuhado ah iyo 289 dhaawac ah.
Waaxdu waxay intaa ku dartay in dad badan oo dhaawac ah ay wali ku hoos jiraan burburka dhismayaasha iyo jidadka, waxayna sheegtay ina adagtahay in kooxaha gurmadka deg degga ah ay gaaraan goobahaasi sababo la xiriira bay tiri weerarada gumeystaha oo ah kuwa si joogta ah u dhacaya.
About The Author
