Ciidanka maamulka gumeystaha Yahuudda ayaa jab xooggan lagu gaarsiiyay weerar kamiin ah oo Talaadadii shalay ahayd ka dhacay koonfurta marinka Gaza, halkaas oo askar iyo sarkaal ciidan looga dilay sahaayinada.
Taliska ciidamada maamulka Yahuudda ayaa bixiyay qiraal ku aaddan weerarka dhabbagalka ah, war kasoo baxay taliskaasi ayaa lagu sheegay in kamiinka looga dilay sarkaal sare iyo 6 askari oo sahaayino ah.
Ciidamada Yahuudda ayaa sheegay in sarkaalka iyo lixda askari ku dhinteen qarax miino oo muqaawamada Falastiin ay ku beegsadeen gaari ciidan oo ay wateen ciidamo ka tirsan katiibada Injineerinka ee maamulkaasi, gaariga ayay sheegeen in uu gubtay, askartii iyo saraakiishii la socotayna ay ku dhex gubteen, marka laga soo tago 7 dhimashada ah, waxay sidoo kale qirteen in kamiinkan looga dhaawacay 16 kale oo askar sahaayino ah.
Dhankeeda warbaahinta maamulka Yahuudda waxay sheegtay in kamiinka oo ahaa mid culus uu beegsaday ciidamo sahaayino ah ku socdaalayay magaalada Khan-yoonis ee dhacda koonfurta marinka, maamulka sahyuuniyadda ayaa dhanka kale sheegay in dhowr askari lagu waayay weerarka dhabagalka ah, waxayna u howlgeliyeen diyaarado nooca dagaalka, kuwaas oo dul heehaabaya goobta uu kamiinku ka dhacay si ay raq iyo ruux ugu helaan askarta la la’yahay.
Sidoo kale ciidamada Sahaayinada ee ku dhaawacmay weerarkan jidgalka ah ayaa lagu daabulay diyaarad nooca qumaatiga u kaca, waxaana la geeyay cisbitaal kuyaal magaalada Tal-abiib.
Warbaahinta Yahuuddu waxay sheegtay in rag ka tirsan muqaawamada ay kammiin culus u dhigeen ciidamo Yahuud ah, waxayna weeraradan si gaar ah uga dhaceen Khaan-yoonis, kooxaha muqaawamadu waxay beegsadeen gaadiid ciidan, mid ka mid ah gaadiidkaasi ayayna goobta ku gubeen sida ay soo wariyeen ilo wareedyo xog-ogaal ah.
Weerarkan kamiinka ah ee ka dhacay Gaza, ayaa kusoo beegmaya xilli shalay ciidamada Yahuudda ay isla koonfurta iyo bartamaha Marinka Gaza ku dileen 80 qof oo Falastiiniyiin ah, kuwaas oo 56 ka mid ah ay ahaayeen dad gargaar sugeyaal ah oo safaf ugu jiray sidii ay u heli lahaayeen wixii ay nolashooda ku maareyn lahaayeen.
About The Author
