Ra’iisul wasaaraha Itoobiya Abiy Axmed ayaa lagu soo warramayaa inuu bixiyey amarka dagaal hor leh oo Itoobiya ay ku qaadayso waddanka Eretriya, kadib markii maalinnimadii shalay xafiiskiisa uu shir ay albaabadu u xirnaayeen kula yeeshay saraakiisha ugu sarraysa Ciidamada Millateriga Itoobiya, sida ilo-wareedyo maxalliya ay soo tebiyeen.
Abiy ayaa ka sanqariyey in Ciidamada dalkiisu ay ku sugan yihiin heerkii ugu sarreeyey ee awoodeed ee ay ku xaqiijin lahaayeen horumarka ay hiigsanayaan, inkastoo aanu caddayn in saraakiisha ciidamadiisa uu kala hadlay weerarkii uu dhawaan shaaciyey inay qaadayaan kunasoo ceshanayaan dekedda Casab ee dalka Eretriya.
Sawirro muujinaya kulanka uu la yeeshay saraakiisha ciidamadiisa ayuu Abiy Axmed ku baahiyey barahiisa bulshada, isagoo raaciyey qoraal muujinaya sida ay dawladda Xabashida Itoobiya ugu diyaar-garowday duullaan ballaaran oo ay doonayso inay qaaddo. Waxaana erayada qoraalkiisan ka mida “Waxaan dhiig iyo dhidid ku dhisi doonnaa dal adag oo mustaqbalka soo socda la safan doona quwadaha adduunka.”
Janaraal Bulti Tadesse (Baltii Tedhaasa), oo ah madaxa Kulliyadda Difaaca Itoobiya ayaa shalay isna sheegay in doonista badda ee Itoobiya ay tahay ujeeddo qaran oo waajib ay tahay in la gaaro, isagoo intaa ku daray oo uu yiri “Ciidanka difaaca waa in maskax ahaan iyo jir ahaanba u diyaar garoobaan, si aan uga jawaabno amarrada dawladda ka soo bixi kara.”
Haddalladan xasaasiga ah ee ay jeedinayaan madaxda ugu sarraysa dawladda Xabashida Itoobiya ayaa kusoo aadaya xilli diyaargarow dagaal oo aad u xooggan laga dareemayo gudaha dalka Itoobiya, waxaa socda dhoola-tursyo ciidan iyo barnaamijiyo lagu kicinayo dareenka dadweynaha oo saacadihii u dambeeyey ay aad u tebinaysay warbaahinta Itoobiya.
Taliyaha ciidamada Itoobiya, Janraal Berhanu Jula ayaa Sabtidii shalay xarigga ka jaray Xarunta Tababarka waxay ugu yeereen Ciidanka Bad-maaxeyaasha Itoobiya oo la shaaciyey in lagu tababari doono Ciidanka Badda. Sidoo kalena isla shalay ayaa la daah-furay taliska ciidan la sheegay inay fulin doonaan hawl-gallada gaarka ah ee Itoobiya.
About The Author
