Madaxa maamulka ku-meel-gaarka ah ee Tigrey, Janaraal Tedesse Werede ayaa ka digay daruuro colaadeed oo uu sheegay inay dul-hoganayaan gobolka Tigrey ee waqooyiga Itoobiya, halkaas oo xiisadaha ka aloosani ay kasii darayaan.
Janaraal Tedesse Werede oo walaac ka muujiyey in gebi ahaanba uu buro heshiiskii lagu joojiyey dagaalkii dhiigga badan ku daatay ee ka dhacay gobolka Tigrey, ayaa maamulka Abiy Axmed ugu baaqay inuu ixtiraamo inuu ixtiraamto qodobadii heshiiskaasi. Isagoo xaaladda siyaasadeed iyo amni ee gobolkaasi ku sifeeyey mid aad u jilicsan.
Isagoo ka hadlayay madal laba maalmood socotay oo ay isugu yimaadeen hoggaamiyeyaal sare oo ka tirsan ururka TPLF ayuu Janaraal Tedesse Werede uu yiri “Sida aan wada ognahay, xaaladdu haatan way cakiran tahay, waxaa jirta daruur dagaal oo muuqata. Waxaa jira xaalado waaweyn iyo kuwo yaryar oo oo is bed-bedelaya. Suurta-galnimada nabadduna maaha mid sugan”
Madashan, oo sida la sheegay ay ku kulmeen saraakiil iyo hoggaamiyeyaal badan oo Tigrey ah ayaa bayaan gebo-gebo ah oo laga soo saaray lagu sheegay in xukuumadda Addis Ababa ay indhaha ka laabatay fulinta qaybo ka mida heshiiskii nabadda ee Pretoria.
War-murtiyeedkan ayaa ku soo beegmaya xilli ay sii kordhayaan xiisadaha ka dhex jira Tigray-ga ee u dhexeeya maamulka daba-dhilifka ah ee gobolkaasi ka jira iyo garabyo ka mida uruka TPLF iyo sidoo kale xiisadda cirka isku sii shareertay ee ka dhex aloosan Itoobiya iyo Ereteriya.
About The Author
