Dhibaatada ka taagan magaalada Al-faashir ee xarunta u ah gobolka waqooyi ee Daarfuur, ayaa marba marka ka dambeysa kasii daraysa, waxayna hadda maraysaa meel aad u daran markii la waayay marooyin dad dhintay lagu kafano.
Dhakhaatiirta ka howlgala Al-faashir ayaa sheegay kafantu ay gabaabsi ka noqotay magaalada, taasi waxay dadka ku qasabtay inay isticmaalaan baco ka sameysan Ballastic si ay ugu asturaan maydadka.
Wargayska Suudaan Tribune oo soo xiganaya laba dhakhtar oo ka hawlgala cisbitaalka Sucuudiga ayaa sheegay in gebi ahaanba aan Al-faashir laga heli karin wax kafan ah, taasi oo keentay in dadka deegaanku isticmaalaan baco si ay ugu daboolaan dadka dhintay.
Waxay tani imaanaysaa xilli magaaladan ay muddo bilo ah go’doomin dhan walba ah iyo weeraro joogto ah ku hayaan maleeshiyada fallaagada RSF ee uu Imaaraadku taageero, kuwaas oo dadka shacabka ah u adeegsada hubka noocyadiisa kala duwan, taasi oo sababtay inay dhintaan dad badan oo rayid ah.
Ilo wareedyo maxalli ah ayaa soo sheegay in heerarka dhimashada rayidka ay sare u kaceen labadii toddobaad ee lasoo dhaafay, fallaagada gurmadka deg degga ah ayaa lagu eedeeyay inay soo galeen xaafadaha iyo hoyga ay ku badanyihiin dadka shacabka ah, halkaas oo ay ku dileen tobannaan qof oo rayid ah.
About The Author
