Kadib markii ciidanka millatariga xabashida itoobiya si xun loogu gummaaday gobolka amxaarada ayuu nidaamka abiy axmed diyaarado dagaal ku biiriyay dagaalka ka socda gobolkaasi, kuwaas oo duqeymo laayaan ah gaysanaya sida lasoo wariyay.
Wargayska Borkena ee kasoo baxa Itoobiya ayaa soo wariyay in dagaalka ka socda gobolka Amhara ee horumarka ay ka gaareen fallaagada Faano ee sida wayn ula dirirsan nidaamka Abiy uu keenay in gobolka lasoo geliyo diyaarado nooca kuwa Drone-ta ah, kuwaas oo duqaymo gaysanaya.
Diyaaradahan aan duuliyaha lahayn ayaa lasoo wariyay inay weeraro dhowr ah fuliyeen degaano ku dhow dhow magaalada Woldia ee dhacda Waqooyiga dalka Itoobiya, xilli jabhada xoreynta dadka Axmaarada ee Fano ay ku socoto inay gacanta ku dhigto magaaladaasi muhiimka ah.
Ilo wareedyo ayaa soo sheegay in goobaha ay duqaymuhu ka dhaceen ay ka mid yihiin magaalooyinka Sanka iyo Jarsa-ber, halkaasi oo lagu beegsaday dad rayid ah, dadka deegaanka ayaana xogta duqaymahaasi u xaqiijiyay wargayska Borkena.
Duqaymahan dadka shacabka ah lagu gumaadayo ayaa kusoo beegmaya xilli weerarada jabhadda Faano ka waddo ismaamulka Amhara ay si xowli ah ku socdaan, labadii maalmood ee ugu dambeeyay weeraradii dhacay ee Fano la gashay ciidanka millatariga ayaa lagu dilay inka badan 470 askari oo ka tirsanaa ciidamada nidaamiga ah ee Abiy.
About The Author
