Wararka ka imaanaya dalka Faransiiska ayaa sheegaya in uu dhintay safiirkii dowladda Koonfur Africa u fadhiyay Paris, kaasi oo u dhintay si yaab leh sida lasoo warinayo.
Safiirkan oo lagu magacaabi jiray Nkosinathi Emmanuel Mtetwa da’diisuna ay ahayd 58 sano jir ayaa maydkiisa laga helay waddada hor marta hoteel lagu magacaabo Xayat, xafiiska dacwad oogaha Faransiiska ayaana xaqiijiyay in safiirkan maydkiisa halkaasi laga helay.
Warbixinnadu waxay tilmaamayaan in safiirka uu dhintay ka dib markii uu ka soo dhacay dabaqa 22-aad ee hotelka Xayat, oo ah dhismo dheer oo kuyaalla agagaarka Porte Maillot ee galbeedka caasimadda Faransiiska ee Paris.
Dacwad oogeyaasha Faransiisku waxay sidoo kale sheegeen in maydka maanta oo Talaado ah laga helay dhismaha hotelka hoostiisa, waxay sidoo kale xaqiijiyeen in uu qol gaar ah ku lahaa dabaqa 22-aad ee Hotelka.
Wararka qaar waxay sheegayaan in uu is dilay safiirka, wakaaladda wararka ee France-Presse oo soo xiganaysa ilo xog ogaal ah ayaa sheegtay in safiirku laga yaabo in uu is-dilay, sababo ku aaddan in uu la ildarnaa niyad-jab.
Safiirkan dhintay ayaa sanaddadii 2014-kii ilaa 2019-kii soo noqday wasiirka dhaqanka ee Koonfur Afrika, sidoo kale waxa uu soo qabtay jagada wasiirka Isboortiga intii u dhaxaysay 2019-kii/2023-kii, madaxweynaha Koonfur Afrika Ramaphosa ayaa bayaan tacsi ah oo uu soo saaray ku sheegay inuu aad uga xun yahay geerida safiirka oo uu ku tilmaamay daruufo naxdin leh oo ka jira caasimadda Faransiiska ee Paris.
About The Author
