Waxaa sii laba-laxaadsaday dagaallada ka socda gudaha dalka Itoobiya, gaar ahaan gobolka Amxaarada, waxaanay wararkii ugu dambeeyey sheegayaan in mar kale guul-darro ba’an dhabarka loo saaray ciidanka Xabashida Itoobiya ee dagaalka kula jira jabhadda Fano.
War kasoo baxay taliska millateriga ee maleeshiyaadka Fano ayaa sheegay inay guullo waaweyn oo millateri ka gaareen dagaallo qaraar oo ay ku qaadeen ciidanka dawladda ee ku sugan deegaanka Galbeedka Wollo ee gobolka Axmaarada.
Ugu yaraan 75 askari oo ka tirsan ciidanka dawladda isla markaana ay ku jireen taliyeyaal sare ayaa dhegta dhiigga loo daray, sida ay sheegatay jabhadda Fano. Waxaanay intaasi ku dartay in hawl-galkaasi uu muddo afar maalmood ah ka socday deggaan lagu magacaabo Mekane Selam.
Saraakiisha lagu laayay dagaalkaasi waxaa ka mida madaxii xafiiska ciidamada ee degmada Borena, madaxii xafiiska ciidamada ee degmada Mekane Selam, iyo mid ka mida taliyeyaashii ciidanka oo magaciisa lagu sheegay Aregaw Kibret.
Taliska millateriga Fano waxay sidoo kale sheegeen in meydka hoggaan sare oo ka tirsanaa ciidanka Xabashida Itoobiya laga helay dhinaca webiga ee Jaamacadda Maqdela Amba. Balse lama sheegin aqoonsiga sarkaalkaasi.
Maleeshiyaadka Fano ee ka hawlgala galbeedka Wollo, waxa ay sidoo kale weerar ku qaadeen isla markaana ay hareereeyeen xerada ciidamo ka tirsan kuwa dawladdu ay deggenaayeen, sidoo kale agagaarka Segno Gebeya ee magaalada Mekane Selam, waxaa lagu laayay askar ka tirsan ciidanka dawladda.
Ciidanka Xabashida Itoobiya ayaa lagu eedeeyay inay gubeen guri ku yaal deegaan la dhaho Tewa isla markaana ruux haween ah ay dileen. Xubno kale oo qoyska ka mid ah oo aan tiradooda la sheegin ayaa lagu soo warramayaa in ay ku dhaawacmeen guriga gubtay.
Weerarradan ayaa imanaya xilli maalmihii la soo dhaafay, Ciidanka Dowladdu ay fuliyeen duqeymo culus oo waxyeello kasoo gaartay dad rayid ah oo ay ka geysteen Waqooyiga Wollo, kuwaas oo ay fuliyeen diyaaradaha aan duuliyaha lahayn ee Drones-ka.
About The Author
