Wararka ka imanaya gudaha Itoobiya ayaa sheegaya ugu yaraan 90 askari oo ka tirsan ciidanka Xabashida Itoobiya ay dhimasho iyo dhaawac ku noqdeen dagaal ka dhacay waqooyiga iyo galbeedka gobolka Amxaarada, sida ay Fano shaacisay jimcihii lasoo dhaafay.
Dagaalkan oo ahaa mid aad u culus ayaa millateriga Itoobiya iyo maleeshiyaadka Fano ku dhex-maray deggaannada Asheewa ilaa Addis Kidam. Waxaana sida la sheegay ciidanka dawladdu ay u dhaqaaqeen dhanka buuraha Adguami iyo Asheewa oo ay isugu tageen.
Sida ay Fano sheegtay, saraakiil ciidan oo taliyayaal ah ayaa ku dhintay dagaalka, inkasta oo magacyadooda aan la shaacin. Waxa kale oo jabhaddu xustay in gebi ahaanba ay dhulka la sintay dhismayaashii dawladda ee deggaanka Addis Kidam.
Sidoo kale hawl-gal qorshaysan oo maleeshiyaadka Fano ay ka fuliyeen deggaanka Agaw Mider oo ka tirsan Gojjam, ayaa dhegta dhiigga loogu daray ugu yaraan 22 askari oo ka tirsan ciidanka dawladda, halka 29 askari oo kalena lagu dhaawacay.
Dagaalkan oo sidoo kale aad loogu wiiqay ciidanka Xabashida Itoobiya ayaa dhanka kalena maleeshiyaadka Fano ay kusoo furteen saanad millateri oo aad u fara badan oo ay ku jiraan 24 qori iyo 328 xabbo oo Rasaas ah.
Waqooyiga gobolka Amxaarada, waxa isna ka dhacay dagaal culus oo ka dhashay kamiin ay maleeshiyaadka Fano ku bartilmaameedsadeen ciidanka Xabashida Itoobiya ee ku sugan galbeedka Gonder, kuwaas oo xilligaasi kusii jeedey deggaanka Abrahajira.
Weerarkan oo dhacay Khamiistii lasoo dhaafay ayaa lagu dilay ugu yaraan 18 askari oo ka tirsan ciidanka dawladda, 26 askari oo kalena waa lagu dhaawacay, sida lagu sheegay bayaan kasoo baxay taliska maleeshiyaadka Fano ee galbeedka Gondar.
Dagaalladan ayaa kusoo aadaya xilli guud ahaan xaaladda Itoobiya ay sii laba-kaclaysay isla markaana dhinaca soohdinta ay wadaagaan Tigreega iyo Canfartana uu ka dhacay dagaal ay kooxda TPLF kula wareegtay 6 tuullo oo ka tirsan deggaannada Canfarta.
About The Author
