Sida ay wararku tibaaxayaan, ciidamada kacaanka Iiraan ayaa gacanta ku dhigay markab shidaal oo wata calanka Jaziiradaha Marshall ee ku yaalla badweynta Baasifik.
Ilo amni oo dhinaca badd ah ayaa warbaahinta u xaqiijiyey in markabkan oo lagu magacaabo Talara ay maanta la wareegeen ilaalada kacaanka Iraan una jiiteen dhinaca biyaha Iiraan.
Talara oo gacanta lagu dhigay isagoo maraya marin-biyoodka ciriiriga ah ee Hormuz, ayaa sida la sheegay kasoo shiraacday magaalada Cajman ee dalka Isu-tagga Imaaraadka Carabta, waxaanu kusii jeeday dalka Singapore.
Markabkan waaa iska leh shirkadda Pasha Finance oo fadhigeedu yahay Qubrus. Waxaanay hay’adda Royal Navy ee UKMTO ay sheegtay in dhacdadan la rumeysan yahay inay tahay fal dawladeed, maadaama markabku uu u jihaystay dhinaca biyaha Iiraan.
“Markabka waxaa badda ku qabtay Ilaalada Kacaanka Iran (IRGC) waxaana loo jiiday dhinaca xeebaha Iran..” ayaa lagu yiri war kasoo baxay Vanguard oo ah koox British ah oo sheegata inay qaabilsan tahay maareynta khataraha badda.
Ambrey oo ah shirkad gaar loo leeyahay oo qaabilsan dhinaca amniga iyo falanqaynta khataraha badda ayaa wakaaladda wararka AP u sheegtay in weerarka lagu qabsaday Talara ay ku lug lahaayeen saddex doonyood oo yaryar oo si toos ah u soo abbaaray markabka.
Dowladda isu-tagga Imaaraadka Carabta ee markabku kasoo ambabaxay iyo sidoo kale dawladda lagu tuhunsan yahay inay qafaalatay ee kacaanka Iiraan ayaan ilaa hadda wax war ah kasoo saarin weerarkan lagu qabsaday markabka Talara.
Qabsashada markabkan ayaa kusoo aadaysa xilli bilihii u dambeeyey ay si weyn isu soo tarayeen suurto-galnimada weerarro ay Iraan ku bartilmaameedsato maraakiibta maraysa marin-biyoodka Hormuz, tan iyo wixii ka dambeeyey weerarkii Maraykanku ku qaaday xarumaheeda Nukliyeerka.
About The Author
