Dagaallo culus oo qaatay muddo 4 maalmood ah ayaa ka dhacay deegaanno dhaca waqooyiga mandiqadda Gonder ee ismaamulka Axmaarada, halkaas oo ay isku hayaan maleeshiyada fallaagada Fano iyo ciidanka millatariga.
Jabhadda Fano ayaa baraha taabacsan ku faafisay in maleeshiyadoodu dhan walba ka hareereeyeen ciidamo ka tirsan kuwa xukuumadda Abiy oo loo soo hubeeyay inay la wareegaan deegaannada Ajire-Janora iyo Dabat Woreda oo kuyaalla waqooyiga Gonder, waxaana halkaas ka dhacay dagaallo culus oo u dhaxeeyay labada ciidan.
Kooxdan waxay sheegtay inay si buuxda u go’doomisay ciidamada dowladda Itoobiya oo isku dayay inay aagga ka baxaan, waxayna sheegeen in ciidanka millatariga uu sameeyay isku day uu meesha uga saarayo ciidankiisa, isaga oo ciidamo badan oo gurmad ah ka keenay magaalooyin badan. balse ay fashiliyeen.
Dagaallada xooggooda waxay sheegeen inay dhaceen 17-ka bishan, kuwaas oo ka dhacay agagaarka Ajire–Janora, Fano waxay sheegtay in dagaalkii ugu adkaa uu ka dhacay Enqash, halkaas oo iska-horimaadku uu si toos ah u socday ilaa 18-ka Noofambar.
Inkastoo aan ilaa hadda si rasmi ah loo ogayn inta uu la egyahay khasaaraha ka dhashay dagaalladan 4-ta maalmood socday, waxaa dhanka kale Fano ay sheegtay in ciidanka Itoobiya ay goobaha dagaalka ka qaateen 18 askari oo qaba dhaawacyo culus, kuwaas oo sida ay sheegeen ku dhaawacmay dagaalkii ugu cuslaa ee ka dhacay Enqash.
Dagaalladan ayaa kusoo beegmaya xilli Itoobiya ay wajahayso dagaallo lafa-jebis ah oo u dhaxeeya ciidanka millatariga Itoobiya iyo jabhadaha hubeysan ee kasoo horjeeda nidaamka uu hoggaamiyo Abiy Axmed.
About The Author
