Dowladda Saliibiyadda Kenya ayaa la daalaa-dhacaysa caqabado dhaqaale oo waaweyn, waxaana soo if-baxaya gadood dhinaca dhaqaalaha ah oo shaqaalaha dowladdu ay samaynayaan.
Isniintii shalay, shaqaalaha garoonka diyaaradaha ugu weyn ee dalka Kenya ayaa shaqo joojin sameeyay, taasoo keentay in dib u dhac uu ku yimaaddo duullimaadyada isla markaana dadkii rakaabka ahaa ay ku xayirmaan garoonka.
Shaqaalaha garoonka diyaaradaha ee Jomo Kenyatta ayaa la sheegay in dowladda ay ka dalbadeen in mushaharka loo kordhiyo iyo in la hagaajiyo xaaladahooda shaqo.
Diyaaradda Kenya Airways ayaa soo saartay digniin ay ku boorinayso macaamiisha in ay hubiyaan xaaladda duulimaadkooda ka hor inta aysan imaan garoonka caalamiga ah ee Jomo Kenyatta ee magaalada Nairobi.
Bayaan shirkaddu soo saartay ayaa sidoo kale sheegay in dib u dhac ku yimid hawlaha xakameynta duulimaadyada ay saameynayaan bixitaanka iyo imaatinka diyaaradaha, loona baahan yahay in jadwalka duulimaadyada wax laga beddelo.
Sida ay wararku tibaaxayaan kumanaan rakaab ah ayaa shalay lagu arkayay iyagoo ku xayiran bannaanka garoonka Jomo Kenyatta.
Shaqaalaha garoonka ayaa la sheegay in toddobaadkii hore ay soo saareen ogeysiis shaqo joojin ah kadib markii dowladdu ku guuldareysatay inay fuliso heshiis ay horey ula galeen ururka shaqaalaha, oo ay ku dalbadeen in mushaharka loo kordhiyo.
Gadoodkan, ayaa kusoo aadaya xilli dowladda Saliibiyadda Kenya ay ku jirto xaalad dhaqaale oo adag, kadib markii ay iskugu biireen musuqmaasuq xarkaha goostay, dayn xad-ka-bax ah, sicir-barar, iyo sidoo kale cashuur tiro-beel ah oo saamayn xun ku yeelatay nolosha bulshada.
About The Author
