Wararka ka imanaya dalka Koonfur Afrika ayaa sheegaya khasaare baaxad leh oo ganacsato Soomaaliyeed kasoo gaaray dibad-baxyo rabshado wata oo ka dhacay waddankaasi.
Mudaharaadkan oo looga soo hor-jeeday nin Nayjeeriyaan ah oo boqornimo iskaga caleemo-saaray Koonfur Afrika ayaa ka dhacay bartamaha magaalada East London ee gobolka Eastern (Iistan Keyp).
Sida ay xogtu tibaaxayso, hanti fara badan ayaa halkaasi ku basbeeshay, kadib markii dab la qabadsiiyey meherado ganacsi iyo weliba gaadiid ay lahaayeen ganacsato Soomaaliyeed.
Intii ay bannaan-baxyadani socdeen waxa kale oo lasoo wariyey in qaar ka mida dibad-baxayaashu ay si toos ah u boobbeen hantidii taallay meheradaha, isla markaana ay dhaawaceen laba qof oo Soomaali ah.
Waxa kale oo wararku sheegayaan in waxyeello xooggan ay soo gaartay mid ka mida masaajidda ku yaalla magaaladii uu mudaharaadkani ka bilowday ee East London.
Dadkan reer Koonfur Afrika ee mudaharaadayay ayaa la sheegay in qaarkood gawaarida basaska looga soo daad-gureeyey magaalooyin kale oo ku yaalla waddankaasi.
Dhibaatadan ayaa qayb ka noqonaysa xad-gudubyada joogtada ah ee isugu jira dilka, dhaca iyo boobka sida joogtada ah loogu geysto ganacsatada Soomaaliyeed ee ku nool waddanka Koonfur Afrika.
About The Author
