Xilli weli ay cakiran tahay xiisadda Iiran iyo Maraykanka, ayaa habeennimadii jimcaha waxay iska horimaadyo goos goos ah oo u dhexeeya ciidamada Iiraan iyo maraakiibta Maraykanka ka dhaceen marin biyoodka Hormuz, sida ay ku warrantay wakaaladda wararka ee Faaris.
Sidoo kale Wakaaladda wararka ee Tasnim oo soo xigatay ilo milatari oo Iiraaniyiin ah ayaa sheegtay in xaaladdu ay degtay, balse suurto-gal ay yihiin in iska horimaadyo kale ay dhacaan.
Militariga Mareykanka ayaa sheegay inay weerareen laba markab oo xiriir la leh Iran oo isku dayayay inay galaan mid ka mida dekedaha Iiraan, iyadoo diyaarad dagaal oo Mareykan ahi ay weerartay maraakiibtaas kuna khasabtay inay dib u noqdaan, sida ay tebiyeen warbaahinta reer-galbeedku.
Ciidanka Ilaalada Kacaanka Iiraan ayaa warsaxaafadeed ay soo saareen ku xaqiijiyey inay gantaallo iyo diyaaradaha aan duuliyaha lahayn ku weerarreen maraakiibta dagaalka Mareykanka, ka dib markii Mareykanku uu dhowr weerar habeennimadii jimcaha ka fuliyay gudaha Iiraan.
Madaxweyne Donald Trump ayaa Khamiistii sheegay in xabbad-joojintu weli shaqaynayso inkastoo ay jiraan iska horimaadyada marinka oo weliba ku fiday meelo ka baxsan Hormuz. Iyadoo Imaaraadkuna ay qireen in jimcihii ay la kulmeen weerarro uga yimid dhinaca Iiraan.
Iran ayaa Mareykanka ku eedeysay inuu jebiyay xabbad-joojinta, waxaanu Wasiirka Arrimaha Dibadda Iran oo jimcihii shalay mar uu arrintan ka hadlayay uu yiri “Mar kasta oo xal diblomaasiyadeed miiska saaran yahay, Mareykanku wuxuu door bidaa halis militari oo aan masuuliyad lahayn”
Mid ka mida wakaaladaha wararka ee Iran ayaa werisay in mid ka mida shaqaalaha markabka la dilay, 10 kalena ay dhaawacmeen, isla markaana afar kale la la’yahay kadib weerar ay habeennimadii jimcaha ciidamada badda Mareykanku ku qaadeen markab ganacsi oo Iran ay leedahay.
Danjiraha Iiraan u fadhiya urur-gaaleedka Qaramada Midoobay, Amiir-Saciid Iirawaani, ayaa warqad rasmi ah u qoray Golaha Ammaanka iyo Xoghayaha Guud ee Qaramada Midoobay, isagoo uga digay cawaaqib xumo ka dhalan karta faragelinta milatari ee Maraykanka.
Sida lagu xusday warqaddan digniinta ah, Iiraan waxay sheegtay in tallaabooyinka milatari ee Maraykanku ka wado Gacanka Faaris iyo Marinka Hormuz ay horseedi karaan masiibo ka baxsan gobolka, khatarna ku ah nabadgelyada caalamka.
Warqadda ayaa lagu cambaareeyay weerarada uu Maraykanku habeennimadii jimcaha fuliyey kuna qaaday laba markab oo saliidda qaada iyo deegaanno-xeebeed ka tirsan dhulka Iiraan. Waxaanu Irawaani caddeeyey in weerarradaasi ay si cad u jebiyeen heshiiskii xabbad-joojinta.
Dhinaca kale, Wasiirka Arrimaha Dibadda ee Maraykanka Macro Rubio ayaa sheegay in Washington ay sugayso jawaabta Iiraan ee ku saabsan hindisaha Maraykanka, isaga oo muujiyey rajada ah in arrintaasi ay albaabka u furto wadaxaajoodyo dhab ah.
Dhankiisa, afhayeenka Wasaaradda Arrimaha Dibadda ee Iiraan Ismaaciil Baqaa’i ayaa sheegay in jawaabta Iiraan ee hindisaha Maraykanka ay weli ku jirto daraasad, isaga oo tilmaamay in dalkiisu aanu muhimad siinayn waqtiyada kama dambaysta ah ee loo qabanayo iyo sidoo kale digniinaha kasoo yeeraya dhinaca Maraykanka.
Isagoo Ismaaciil Baqaa’i u duur-xulaya Maraykanka ayaa waxa uu yiri “Haddii aad aragto miciyaha libaaxa oo bannaanka yaalla, ha u malayn inuu libaaxu dhoolla-caddeynayo.”
Sidoo kale Wasiirka Arrimaha Dibadda Maraykanka oo kulan uu la yeeshay raysal wasaaraha Talyaaniga Giorgia Meloni, ayaa su’aal geliyay sababta Talyaaniga iyo xulafada kale aysan u taageerayn dadaallada Washington ku sheegayso in dib loogu furayo marinka Hormuz.
Isagoo Talyaaniga iyo dalalka la midka ah la hadlaya ayaa waxa uu yiri “Ma waxaad caadi ka dhigaysaan waddan sheeganaya inuu xukumo marin-biyood caalami ah? Sababtoo ah haddii taas caadi laga dhigo, waxaad abuureysaan tusaale meelo kale oo badan lagu dayan doono,”
Wasaaradda Maaliyadda Mareykanka ayaa Jimcihii ku dhawaaqday cunaqabateyn lagu soo rogay 10 qof iyo shirkado ay ku jiraan qaar ku yaalla Shiinaha iyo Hong Kong, kuwaasoo lagu eedeeyay inay ka caawinayeen militariga Iran helitaanka hub iyo agab kale oo loo isticmaalo samaynta drones-ka.
Bayaan ay soo saartay wasaaraddu ayay ku sheegtay inay weli ay diyaar u tahay inay tallaabooyin dhaqaale ka qaaddo warshadaha militari ee Iran si Tehran aysan dib ugu soo ceshan awooddeeda wax-soo-saar iyo sidoo kale awooddeeda saamayneed ee dibadda.
About The Author
