Waxaa cirka iskusii shareeray ismariwaaga udhaxeeya kooxda Riddada Soomaaliya ee uu hoggaamiyo Xasan Gurguurte iyo maamulka isku magacaabay Galmudug.
Wararka ka imaanaya gobollada dhexe, ayaa sheegaya in boqolaal maleeshiyaad ah loo daadgureeyay magaalada Dhuusamareeb ee gobolka Galguduud, halkaas oo uu ku suganyahay Axmed Cabdi Kaariye (Qoorqoor).
Ciidamo farabadan oo wata gaadiidka dagaalka ayaa ka baxay degmada Xarardheere, waxayna sii mareen deegaanka Baxdo iyagoona maanta gelinkii dambe gaaray magaalada Dhuusamareeb.
Saraakiisha ciidamadan hoggaaminaysa ayaa lasiiyay awaamir ah in ay gacan bir ah ku qabtaan cid walba oo isku dayda in ay is hortaag ku sameyso mashruuca doorasho qof iyo cod ah.
Sidoo kale ciidamo ka baxay deegaannada Wisil iyo Xananbuurre ayaa ujiheystay degmada Dhuusamareeb.
Wararkii ugu dambeeyay ayaa sheegaya in shalay gelinkii dambe ay laba diyaaradood oo Muqdisho ciidamo ka daabulay ay ka degeen magaalada Dhuusamareeb, halkaas oo laga dareemayo xiisadda colaadeed.
Ilo wareedyo, ayaa sheegaya in hoggaamiyaha maamulka Galmudug uu isna ciidamo gurmad ah ka helay magaalooyinka Cadaado,Godinlabe iyo deegaanno kale oo kaabiga ku haya Dhuusamareeb.
About The Author
