Ciidamada ayaa waaberigii hore ee saaka weerarro ba’an kula jarmaaday saldhig uu Mareykanku ku leeyahay waddanka Urdun iyo 21 bartilmaameed oo kale oo ku kala yaalla saldhigyo cirka iyo badda ah oo Mareykanku ku leeyahay dalalka Khaliijka.
Weerarradan oo taliska millateriga Ilaalada Kacaanka Iiran uu sheegay in loo adeegsaday diyaaradaha aan duuliyaha lahayn iyo gantaallada riddada dheer, ayaa lagu tilmaamay aargoosi ka dhan ah duqaymo xalay uu Maraykanku ka fuliyey gudaha waddanka Iiraan.
Ilo ciidan oo dhinaca Iiraan ah ayaa sheegay in qiimeyn hordhac ah oo lagu sameeyay weerarradan saaka ay muujinayso in qiyaastii 70% bartilmaameedyadii la qorsheeyay si sax ah loo gaaray, kadib markii diyaaradaha Drones-ka iyo gantaallada riddada dheer-ba ay si guul leh uga gudbeen nidaamyada difaaca ee saldhigyada Mareykanka, khasaare culus-na ka geysteen goobahaasi.
Ilaalada Kacaanka ayaa sheegay in bartilmaameedyada ay beegsadeen ay ka mid yihiin hangarro ay ku jiraan diyaaradaha dagaalka ee F-35 iyo xarun talis. Waxaanay Urdun ay xaqiijisay in uu jiro burbur ka dhashay weerarradan ay fulisay Iran.
Mas’uuliyiin u hadlay waddamo ay ka mid yihiin Urdun, Baxreyn, iyo Kuweyt ayaa qiray weerarrada Iran ka geysatay gudaha dalalkaasi, iyadoo dhanka kale Wasaaradda Difaaca Mareykanka ee Pentagon-ku ka gaabsatay inay wax faallo ah ka bixiso jawaabta Iiraan, mar ay warbaahinta Reuters wax ka waydiisay arrintan kasoo cusboonaatay bariga dhexe.
Weerarradan ay qaadday saacadihii lasoo dhaafay ayaa yimid kadib markii millateriga Mareykanku sheegay inuu bartilmaameedsaday difaacyada cirka ee Iiraan, xarumaha hagista dhulka iyo goobaha raadaarka kormeerka ee ku dhow marin-biyoodka Hormuz.
Madaxweynaha Maraykanka Donald Trump, ayaa sheegay in tallaabadan ay ciidamadiisu qaadeen ay jawaab u tahay, mid ka mida diyaaradaha dagaalka ee dowladda Maraykanka gaar ahaan nooca qummaatiga u kaca ee Helcopter-ka, oo talaadadii ku burburtay agagaarka marinka Hormuz, taas oo Trump uu sheegay in Iraan ay soo ridday.
Iran oo ka hadashay arrintan ayaa si cad u beenisay inay wax lug ah ku lahayd soo-ridista diyaaraddaasi, waxaanay ku tilmaameen marmarsiiyo uu Maraykanku food-saaro uga dhiganayo weerarrada gardarrada ah ee saacadihii lasoo dhaafay uu ka fuliyey gudaha waddanka Iiraan.
Ilaalada Kacaanka Iran waxay si adag ugu digeen Maraykanka. Sidoo kale taliska guud ee ciidamada Iiraan ayaa ku hanjabay in haddii Washinton fuliso weerarro kale, ay iyaguna qaadi doonaan hawl-gallo culus oo ka ballaaran kuwii hore, isla markaana ay beegsan doonaan liiska bartilmaameedyo horey loo qorsheeyey oo ku yaalla gudaha gobolka.
Taliska Dhexe ee Ciidamada Maraykanka oo u muuqda inay u adkaysan kari waayeen dhirbaaxada kulul ee Iran ayaa ku dhawaaqay inay soo gabo-gabeeyeen weerarradii duqaymaha ahaa ee xalay ka geysteen gudaha waddanka Iran, kuwaas oo la sheegay inay socdeen muddo ku dhow 4 saacadood oo xiriir ah.
Geesta kale, Suuqa shidaalka adduunka ayaa durba ka falceliyay xiisaddan cakiran ee saacadihii lasoo dhaafay kasoo cusboonaatay dagaalka bariga dhexe, waxaana isla markiiba la dareemay koru-kac ku yimid qiimaha shidaalka.
Si kastaba ha ahaatee, weerarradan u dambeeyey waxay sii adkeyn karaan ayaa la leeyahay dadaallada lagu dhex-dhexaadinayo heshiis nabadeed oo lagu soo afjaro dagaalka ballaaran ee Bariga Dhexe isla markaana dib loogu furo marin-biyoodka Hormuz.
About The Author
