Wararka ka imaanaya xeebaha waddanka Yeman, ayaa sheegaya in kooxo hubeysan ay fuliyeen weerar ka dhan ah markab xamuul ah oo marayay xeebaha dalkaasi, halkaas oo uu markabku si dirqi ah ku baxsaday.
Hay’adda dhanka howlgallada badaha u qaabilsan dowladda Ingiriiska, ayaa warbixin ay soo saartay ku xaqiijisay in laga hortagay isku day weerar oo koox hubeysan ku dooneysay inay ku qafaalato markabka oo ah mid xamuul ah oo marayay meel qiyaastii 50 Mayl oo dhanka badda ah u jira magaalada Shixri ee dhacda gobolka Xadramoot ee Bari dalka Yeman.
Hay’addu waxay sheegtay in uu markabka kusoo wargeliyay isku dayga weerarka ah, waxayna sheegeen in kooxda oo ka kooban 5 xubnood ay isku dayeen inay soo fuulaan markabka, balse la iska caabiyay, markabkana uu si deg deg ah goobta uga baxsaday.
Warbixinta kasoo baxday hay’adda dhanka badaha u qaabilsan dowladda Ingiriiska waxay intaas ku dartay in shaqaalihii saarnaa markabka ay dhammaan bad qabaan, markabkana uu ka leexday jihadii uu ku socday, weerarka kadib waxay sheegtay in uu safarkiisa sii watay oo uu dekado kale kusii jeeday.
About The Author
