Sida ay sheegtay jabhadda Fano, ugu yaraan laba sarkaal oo ka tirsanaa ciidanka Difaaca Itoobiya ayaa dhegta dhiigga loo daray, kadib weerar rogaal-celis ah oo ka dhacay degmada Degadamot, oo ku taalla aagga Gojjam ee gobolka Amxaarada.
Sida ay wararku tibaaxayaan dagaal culus oo u dhaxeeya ciidanka Xabashida Itoobiya iyo maleeshiyaadka jabhadda Fano ayaa ka socda aagga Gojjam, kaas oo socda muddo ka badan hal todobaad.
Madaxa xiriirka dadweynaha ee Jabhadda Fano oo lagu magacaabo Asres Mare ayaa shaaciyey in saraakiishan lagu dilay dagaal culus oo subaxnimadii jimcaha ka dhacay agagaarka degmada Degadamot.
Saraakiisha la laayay ayaa lagu kala magacaabi jiray Kornayl Abere, oo ahaa taliyaha Qaybta 76aad ee Taliska Bari ee Ciidamada Difaaca Itoobiya, iyo Gaashaanle dhexe Bekele, oo ahaa taliyaha Guutada 79aad oo iyaduna hoos-tagta isla taliska Bari ee ciidamada Itoobiya.
Sarkaalka u hadlay Fano oo sidoo kale waraysi siiyey Anchor Media, wuxuu sheegay in maleeshiyaadka Fano dagaal adag kula jiraan ciidamada Itoobiya ee la geeyey degmada Degadamot, isagoo intaa ku daray in dagaalku uu weli ka socdo aaggaasi.
Marka laga tago aaggan, sidoo kale dagaallo culus ayaa laga soo sheegay meelo kale oo badan oo ka tirsan isla gobolka Amxaarada, iyagoo jabhadda Fano ay aagaggaasna guulo ka sheegatay, walow aysan faahfaahin dheeraad ah ka bixin.
Taliska Menelik ee jabhadda Fano ku leedahay aagga Lalibela ee qaybta waqooyi ee Wollo, ayaa sida lasoo wariyey sheegay in gacanta uu ku dhigay in ka badan 420 askari, oo isku soo dhiibay kadib markii ay kasoo goosteen ciidanka difaaca Itoobiya.
Maamulka Abiy, ilaa hadda kama uusan hadal dilka saraakiishaasi, usbuuc ka hor ahayd markii Fano ay shaacisay in dagaallo ka dhacay aaggaasi ay dhegta dhiigga ugu dartay ugu yaraan 306 askari isla markaana ay nolosha ku qabatay 43 askar oo kale.
About The Author
