Khasaare culus oo weli tirakoobkiisu socdo isla markaana isugu jira dhimasho, dhaawac iyo burbur baaxad leh ayaa ka dhashay laba dhul-gariir oo aad u xooggan oo arbacadii lasoo dhaafay ku dhuftay waddanka Venezuela ee Koonfur Ameerika.
Xogihii u dambeeyey ee soo baxay ilaa waaberigii saaka oo Axad ah ayaa sheegaya in dhimashada ay ku dhowdahay 1430 ruux, iyadoo laga cabsi-qabo in tiradu ay intaasi kasii badato. Iyadoo nolol iyo geeri toona ilaa hadda aan lagu haynin dad aad u fara badan.
Sida ay wararku tibaaxayaan in ka badan 55,000 qof ayaa la la’yahay, halka burburka iyo waxyeelladu ay yihiin kuwo aad u ballaaran, iyadoo warbixinnadu ay sheegayaan in dhaawacyada ilaa hadda tirakoobkooda la xaqiijiyey ay ka badan yihiin 3,000 qof.
Malaayiin qof ayaa lasoo weriyey in aanay haysan adeegyo caafimaad isla markaana ay wajahayaan biyo la’aan iyo hoy la’aan. Iyadoo dad badan oo kalena ay ku dhibaataysan waddooyinka kuwaas oo ka baqaya dhulgariirro kale oo ka dhaca aagaggaasi, halka qaar badani ay weli ehelladoodii ka raadinayaan burburka hoostiisa.
Gobolka xiga dhinaca xeebta ee loo yaqaan La Guaira una dhow Badda Caribbean ayaa ka mid ah meelaha ugu daran ee burburku ugu xooggani uu ka dhacay. Guryo badan ayaa dumay, iyadoo dad badanna weli laga baadigoobayo burburka hoostiisa.
Caasimadda Venezuela ee Caracas oo sidoo kalena ah magaalada ugu weyn waddankaasi ayaa ka mida meelaha dhulgariirkani uu sida weyn u saameeyey, walow ay ka daran yihiin La Guaira iyo deggaannada dhaca xeebaha waqooyi.
Labadan dhul-gariir oo kala dambeeyey wax ka yar saacad, cabbirkoodana lagu kala sheegay 7.2 iyo 7.5 , ayaa nonaya mid ka mid ah masiibooyinka ugu waaweyn ee muddooyinkan dambe ku habsada Latin America, iyadoo sidoo kalena dhacdadani ay uga sii darayso dhibaatooyina dhaqaale iyo siyaasadeed oo horey-ba uga jiray gudaha Venezuela.
About The Author
