Wakaaladda Wararka Tasnim oo ka mid ah warbaahinta ugu saamaynta badan Iran, xiriir dhowna la leh Ciidanka Ilaalada Kacaanka Iran ayaa baahisay warbixin muujinaysa xogo dheeraad ah oo ku saabsan qorshayaasha dhagaraysan ee Yahuuddu ka damacsan tahay gobollada waqooyi ee Soomaaliya iyo khataraha ku gedaaman.
Warbixintu waxay sheegtay in ka hor booqashadii uu madaxa maamulka ashahaado-la-dirirka Somaliland ku tagay Qudus, ay jireen dhaqdhaqaaqyo millateri iyo kuwo amni oo maamulka Yahuuddu ka wadday gudaha Somaliland.
Sidoo kale warbixintu waxay xustay in heer hawl-gal ah uu hadda ku dhow yahay saldhig ciidan-badeed oo tan iyo 2017-kii dowladda riddada ee Imaaraadka Carabtu ay dhismihiisa ka wadday agagaarka dekedda Berbera.
Kaabeyaasha saldhigga waxaa ka mid ah ayay tiri warbixintu, dhabaha ay diyaaradahu ka kacaan oo dhererkiisu yahay 4 km, bakhaarro lagu kaydiyo rasaasta oo si adag loo dhisay, iyo nidaamyo difaac oo loo adeegsado ka hor-tagga weerarrada cirka.
Dhinacyada loo badinayo in maamulka saldhiggaasi ay la wareegaan ayay warbixintu sheegtay inay ka mid yihiin, Imaaraadka, Taliska Ciidamada Maraykanka ee AFRICOM, iyo Itoobiya oo heshiis is-afgarad la saxiixatay Somaliland si ay marin uga hesho badda.
Warbaahinta Iran ee Tasnim waxa kale oo ay carabowday in sawirro laga qaaday dhinaca hawada sare ay muujiyeen in saldhiggani uu qaabili karo gujisyada Yahuudda, gaar ahaan nooca loo yaqaan Dolphin, kuwaas oo laf-dhabar u ah saddex-geesoodka awoodda Nukliyeerka ee Sahaayinada.
Ilo amni oo Tasnim ay soo xigatay ayaa sheegaya in gujisyada Yahuudda ee Dolphin ay sidoo kale ku hubaysan yihiin gantaallada riddada dheer iyo kuwa ballistic-ga, kuwaas oo sida la sheegay gaari kara masaafo dhan 1,000 km.
Wakaaladda Wararka ee Tasnim iyadoo arrintan ka hadlaysa waxay tiri “Dhab ahaantii, joogitaanka ciidamada badda ee Yahuudda ee Somaliland iyo diyaarinta dekedda Berbera si ay u qaabbisho gujisyada Dolphin waa qayb ka mid ah xiriir istaraatiiji ah oo ay ku lug leeyihiin Imaaraadka Carabta, Itoobiya iyo Maraykanka.”
Warbixintan ayaa kusoo aadaysa xilli uu sii xoogaysanayo xiriirka maamullada Hargeysa iyo Talaabiib, isla markaana heshiisyo amni oo hor leh ay dhawaan kala saxiixdeen, iyadoo horey-na loo xaqiijiyey in Yahuuddu ay saldhig millateri ka samaysatay gudaha deggaannada uu ka arrimiyo maamulka ashahaado-la-dirirka Somaliland.
About The Author
