Dowladda Uganda ayaa lasoo wariyey inay aqbashay in ciidamadeedu ay qayb ka noqdaan ciidamo caalami ah oo ay abaabulayaan dalalka reer-galbeedka gaar ahaan Maraykanka, kuwaas oo lagu xoojinayo gummaadka iyo barakicinta ay Yahuuddu ka waddo marinka Qaza.
Wargeyska dowladda Uganda ee New Vision, oo soo xigtay ilo sare oo millateri, ayaa sheegay in madaxweyne Yoweri Museveni uu si kal iyo laab ah u soo dhaweeyey codsi uga yimid Trump oo ah in Kampala ay ka qeybqaadato ciidamada la rabo in la geeyo marinka Qaza, kuwaas oo loogu magac-daray Ciidanka Xasilinta Caalamiga ah ee Qaza.
Ciidamadan oo ah gumeysi hor leh oo ku wajahan muslimiinta reer Falastiin, lana rabo in hubka looga dhigo kooxaha muqaawada, ayuu wargeysku sheegay in Uganda ay ku biiri doonto dalal horey u ballanqaaday ka qayb-qaadashada hawl-galkaasi, oo ay ka mid yihiin Morocco, Kosovo, Albania iyo Kazakhstan.
Waxaa la qorsheynayaa isla markaana warbixintu xustay, in saldhig taageero iyo sahay ah laga sameeyo dhinaca deggaannada ku hoos-jira gumaysiga Yahuudda ee marinka Karam Abu Saalim, kaas oo marka hore qaabili doona ku dhowaad 500 askari, ka hor inta aan loo dirin gudaha Qaza.
Wiilka uu dhalay madaxweynaha Uganda Yuweri Musaveri oo ah taliyaha ciidamada Uganda, Jeneraal Muhoozi Kainerugaba ayaa dhowr bilood ka hor si cad u muujiyay taageerada uu u hayo Yahuudda, gaar ahaan markii uu socday dagaalkii Maraykanka iyo Sahaayinadu ay ku qaadeen waddanka Iiraan.
Dowladda Uganda oo marnaba aan la gabban mowqifkeeda Sahyuu-saliibiga ah, ayaa horey u shaacisay, marar badanna ka sheegtay meelo fagaare ah, in ciidamadeedu ay duullaan macatab-ku-dirir ah kaga jiraan dalka Soomaaliya.
About The Author
