Khilaafka siyaasadeed ee u dhexeeya Dowladda Itoobiya iyo maamulka Tigray ayaa mar kale sii xoogeysanaya, iyadoo labada dhinac ay is dhaafsanayaan eedeymo culus oo muujinaya in kalsoonidii ka dhalatay heshiiskii nabadda ee Pretoria ay sii wiiqmeyso. Xiisaddan cusub ayaa sare u qaadday walaaca laga qabo in gobolka uu mar kale u jiheysto isku dhac hubeysan.
Maamulka Tigray ayaa ku eedeeyay dowladda Abiy Axmed inay abaabushay isu-soo-bax lagu sheegay mid nabadeed si loo wiiqo mowqifka shacabka Tigray. Sidoo kale wuxuu maamulka ku andacooday in dowladda federaalku waddo diyaargarow ciidan, weerarro diyaaradaha aan duuliyaha lahayn ah iyo olole sumcad dil ah oo ka dhan ah shacabka Tigray.
Dhanka kale, qabanqaabiyeyaasha dibadbaxa oo isku magacaabay Golaha Nabadda iyo Isbeddelka Tigray ayaa sheegay in ujeeddada isu-soo-baxu tahay in lagu dalbado hirgelinta heshiiska Pretoria, joojinta askareynta khasabka ah ee dhalinyarada iyo in xal nabadeed loo helo xaaladda bani’aadannimo, dhaqaale iyo amni ee ka jirta gobolka.
Xiisadda ayaa sii xoogeysatay kadib markii golaha deegaanka Tigray uu ku dhawaaqay in heshiiskii Pretoria uusan mar dambe noqon karin saldhig lagu xalliyo khilaafka, isagoo dowladda federaalka ku eedeeyay inay hor istaagtay fulinta heshiiska. Dowladda Federaalka ayaa iyaduna TPLF ku eedeysay inay xiriir la leedahay Eritrea iyo Suudaan, eeddaas oo ururka TPLF uu si cad u beeniyay.
Dagaalkii Tigray ee billowday dabayaaqadii sanadkii 2020 ayaa sababay khasaaro naf iyo maalba leh, malaayiin qofna waxay ku barakaceen gudaha iyo dibadda dalka. Inkastoo heshiiskii Pretoria ee 2022 uu soo afjaray dagaalladii waaweynaa, haddana arrimo badan oo salka ku haya khilaafka, sida amniga, maamulka iyo fulinta qodobbada heshiiska, ayaan weli si buuxda loo xallin.
Hadallada kulul ee labada dhinac, eedeymaha is-daba jooga ah iyo cabashada laga muujinayo dhaq-dhaqaaqyada militari waxay muujinayaan in weli ay muuqdaan saansaanta colaad cusub.
About The Author
