Kooxda Xuuthiyiinta ee fadhigeedu yahay Yeman, ayaa shaacisay inay qaaday silsilado weeraro ah oo ay ku beegsatay bartilmaameedyo ay ku sheegtay kuwa xasaasi ah oo ka dhan ah dowladda Sucuudiga, ka dib markii nidaamka Aala-sucuud weeraro ka gaystay magaalooyinka ay gacanta ku hayaan Xuuthiyiintu.
Weeraradan oo Xuuthiyiintu u adeegsadeen gantaallo Ballistic ah iyo diyaarado aan duuliye lahayn, ayaa lasoo wariyay inay beegsadeen xarumaha shirkadda Aramko ee Sucuudigu ku leeyhay magaalooyinka Jaazaan iyo Yanbu.
Difaaca madaniga xukuumadda Riyaad, ayaa seeriga digniinta hal jeer ka daaray magaalada Jaazaan, halka magaalada Yanbuna uu ka shiday ilaa 3 jeer.
Yaxya Sariic, oo ah Afhyeenka ciidanka kooxda Xuuthiyiinta, ayaa sheegay in kooxdiisu aysan marnaba ka waaban doonin kordhinta weeraradooda ka dhanka ah maamulka Aaala-sucuud.
Dhanka kale, warbaahinta maxalliga ah ee Yemen ayaa maant shaacisay in duqaymo culus oo dhanka cirka ah lagu beegsaday xoogag Xuuthiyiin ah oo ku sugnaa gobollada Ma’rib iyo Al‑Jawf.
Goobaha sida gaarka ah duqaymuhu u beegsadeen, ayaa lagu sheegay goobaha gantaallada laga tuuro iyo bakhaarro hub ah, inkastoo uusan jirin war rasmi ah, haddana wararku waxay sheegayaan in weeraradaas lagu dilay xubno Xuuthiyiin ah oo ay ku jiraan khubaro dhanka gantaallada.
Telefishanka rasmiga ah ee Yeman oo xogta duqaymahan iyo sidoo kale dadka ku dhintay, ayaan si rasmi ah u sheegin cidda fulisay duqaymaha.
About The Author
