Itoobiya ayaa mar kale si adag u diidday eedeymaha Masar ee ku saabsan Biyo-xireenka GERD, iyadoo sheegtay in halkii ay eedo aan sal lahayn soo jeedin lahayd ay Masar ku soo noqoto wadahadalladii hore ee Midowga Afrika uu hoggaaminayay.
Wasiirka Biyaha iyo Tamarta Itoobiya, Habtamu Itefa, ayaa beeniyay waxa uu ku tilmaamay eedeymo aan sal iyo raad lahayn oo uu sheegay inay kasoo yeereen Masar, kuwaas oo uu carabaabay inay la xiriiraan Biyo-xireenka Al-Nahda ee Itoobiya ka hir-gelisay webiga Niil.
isaga oo sheegay in Qaahira ay faa’iido badan ka heli lahayd haddii ay dib ugu soo laabato wadaxaajoodyadii ku salaysnaa hannaanadii hore loogu heshiiyey, halkii ay sii wadi lahayd eedeymo aan macquul ahayn oo ka dhan ah mashruuca.
Wasiirku wuxuu sheegay in aysan macquul ahayn in Masar ay biyo-xireenkan ku tilmaanto khatar amni, isagoo xusay in Itoobiya ay mashruuca ku maalgelisay kuna dhistay dhaqaale gudaha ah si ay u daboosho baahideeda sii kordheysa ee korontada.
Habtamu wuxuu sidoo kale ganafka ku dhuftay sheegashada Masar ee ah in buuxinta iyo hawlgelinta biyo-xireenka Al-Nahda uu hoos u dhigay heerarka biyaha ee keydadka biyaha Masar, isagoo arrintaas ku tilmaamay sheegasho aan la aqbali karin.
Wasiir Habtamu Itefa wuxuu ku adkeystay in Masar ay faa’iido badan ka heli doonto haddii ay dib ugu soo laabato wada-xaajoodyada, isagoo dhanka kalena carrabka ku adkeeyay in Itoobiya ay xaq u leedahay horumarinta iyo ka faa’iidaysiga kheyraadkeeda dabiiciga ah.
Hadalladan ayaa imanaya xilli mas’uuliyiin sare oo Masaari ah ay mar kale ku celiyeen in biyo-xireenka Al-Nahda oo ay sheegeen in lagu maamulo siyaasad hal dhinac ah uu khatar ku yahay amniga biyaha ee Masar, isla markaana saamayn taban ku yeelatay Masar iyo Suudaan.
About The Author
