Kadib markii maamulka ashahaado-la-dirirka Puntland uu muddo kooban u qabtay inay isku soo dhibaan maleeshiyaadka taabacsan Xasan Gurguurte ee ku sugan gudaha deegaannadaasi, ayaa waxaa soo baxaya warar sheegaya in qaar ka mid ah maleeshiyaadkaasi ay isku dhiibeen maamulka Puntland, halka kuwo kalena ay ka baxsadeen.
Maleeshiyaad fadhigoodu ahaa xero ciidan oo ku taalla waqooyiga Gaalkacyo ayay wararku tibaaxayaan in saqdii dhexe ee xalay isaga guureen xeradii ay deggenaayeen iyaga oo u qaxay dhinaca koonfureed ee isla magaalada Gaalkacayo ee uu ka arrimiyo maamulka Galmudug.
Dhinaca kale, warar ka imanaya gobolka Bari ayaa sheegaya in maamulka daba-dhilifka ah ee Puntland uu saaka si buuxda ula wareegay xero ay maleeshiyaadka PSF ee dhawaan ku biiray kooxda Villa Soomaaliya ku lahaayeen magaalada Boosaaso.
Warsaxaafadeed kasoo baxay taliska maleeshiyaadka booliska ee Puntland ayaa lagu sheegay in maanta oo Isniin ah ay la wareegeen taliska iyo xarunta maleeshiyaadka PSF ee magaalada Boosaaso, iyagoo sheegay in tallaabadani ay daba socoto hawl-gal amni oo shalay ka dhacay magaalada Gaalkacayo.
Shakhsiyaadka iyo maleeshiyaadka taabacsan kooxda riddada Soomaaliya ee fadhigeedu yahay caasimadda Muqdisho kuna sugan gudaha deggaannada Puntland ayaa mar kale loo baaqay inay sida ugu dhakhsaha badan isugu soo dhiibaan laamaha ammaanka ee maamulka Puntland.
Ilo-wareedyo ayaa sheegaya in la-wareegista xerada PSF ee magaalada Boosaaso ay ku dhacday si nabad-gelyo ah kadib markii is-afgarad laga gaaray arrintaasi. Iyadoo dhinaca kalena kolonyo gaadiid dagaal ah oo isaga guuray duleedka Qardho ay saacadihii lasoo dhaafay gaareen magaalada Laascaanood.
Shalay ayay ahayd markii Saciid Cabdullaahi Deni uu ku dhawaaqay in muddo 48 saac gudahood ah ay isku soo dhiibaan dhammaan maleeshiyaadka hubaysan ee taabacsan maamulka Xasan Sheekh Maxamuud kuna sugan gudaha deggaannada Puntland.
Khilaafka daba-dhilifyada Soomaaliya ayaa haatan xarkaha goostay, waxaanu kusoo aadayaa xilli ciidamada Afrikaanta ee ku sugan Soomaaliya ay ku jiraan xaalad qoob-gariir ah kadib markii Maraykanku uu dhawaan si rasmiya u shaacisay in dhammaadka sannadkan uu gebi ahaanba jaraayo dhaqaalihii uu ku bixin jiray duullaanka Soomaaliya.
About The Author
