Ugu yaraan 30 askari oo ka tirsanaa ciidamada dowladda daba-dhilifka ah ee dalka Yemen ayaa lagu soo warramayaa inay ku dhinteen weerarro maanta ay kooxda shiicada ah ee Xuutiyiintu ku qaadeen saldhigyo ciidan oo ku yaalla bartamaha Yemen.
Ilo ka tirsan dowladda ayaa sheegay in gantaallo iyo diyaarado aan duuliye lahayn lagu weeraray dhowr saldhig oo ay maamulaan Ciidamada Gurmadka Degdegga ah kuwaas oo ku yaalla deegaanka Al-Ruweyk ee gobolka Ma’rib iyo deegaanka Al-Cabr ee gobolka Xadramowt.
Wasiirka Caafimaadka Yemen, Qaasim Baxiibax, ayaa cambaareeyay weerarkan, isagoo sheegay in ujeeddadiisu ahayd in lagu wiiqo amniga iyo xasilloonida dalka. Hase yeeshee, ma uusan shaacin tirada rasmiga ah ee dhimashada ama dhaawaca ka dhashay duqayntaasi.
Afhayeenka militariga Xuutiyiinta Yaxya Sariic, ayaa sheegay in ay beegsadeen ciidan fara badan oo Sacuudiyaan ah oo lagu ururiyey saldhigyadaasi. Waxaanu intaas ku daray in hawl-galladaasi ay u adeegsadeen gantaallo iyo diyaarado Drones ah isla markaana sababeen boqollaal khasaare ah.
Weeraradan maanta lagu qaaday xeryaha ciidamada oo sidoo kale ay ku dhaawacmeen ugu yaraan 15 askari, ayaa la sheegay in ay yihiin kuwii ugu dhimashada badnaa ee dalkaas ka dhaca sannado badan.
Dagaallada Yemen ee u dhexeeya Xuutiyiinta ay taageerto Iran iyo ciidamada dowladda daba-dhilifka ah ee Sacuudigu uu taageero ayaa toddobaadyadii u dambeeyay sii xoogaystay.
About The Author
