Khilaafa xoogan ayaa soo kala dhexgalay dowladaha Turkiga iyo Maraykanka, kaas oo salka ku haya arimo dibulmaasiyadeed oo u dhexeeya labada dowladood.
Turkiga ayaa aad uga carootey tallaabo uu qaaday maamulka Maraykanka taas oo ah in Fiizaha dal ku galka maraykanka laga mamnuucay muwaadiniinta Turkiga, waxaana Ordogan madaxweynaha Turkiga uu arintan ku tilmaamay mid sharci darro ah oo aan la aqbali Karin.
Ordogan oo muujinaya inuu ka carooday tallaabadaas ayaa weerar afka ah ku qaaday Maraykanka, isagoona safiirka Maraykanka u fadhiya Ankara ku tilmaamay inuu yahay Jaajuus howshiisa ay ka weyntahay Safiirnimo.
Wuxuu diiday dhowr jeer kulamo uu safiirku codsaday inuu la yeesho Ordogan, taas oo muujineysa sida uu usii xumaanayo xiriirka labada dowladood.
Ciidamada Amaanka ee Turkiga ayaa xabsiga dhigay tobanaan Ruux oo ay ku jiraan dad Ameerikaan ah kuwaas oo ay ku eedeyneyso iney ku kaceen falal ka dhan ah Dastuurka u yaala dalkaas, oo ay kamid tahay iney la shaqeeyeen nin lagu magacaabo Fatxullaahi Golan oo Turkigu ku eedeynayo inuu ahaa qofkii abaabulay afgembigii fashilmey ee sanadkii hore.
Wargeyska Washington Post ee kasoo baxa Maraykanka ayaa weerar afka ah ku qaaday dowladda Turkiga, waxaana muwaadiniinta Maraykanka eek u xiran Turkiga uu wargeysku ku tilmaamay iney yihiin maxaabiis u xiran arimo siyaasadeed.
Dowladaha Turkiga iyo Maraykanka ayaa lagu tilmaamaa xulafada cadowga isku ah, waa labo dowladood oo dano badan ay ka dhexeeyaan oo ay kamid tahay la dagaalanka Muslimiinta, hadana dhanka kale ku kala aragti duwan arimo farabadan, waxaana khuburada arimaha xiriirka caalamiga ka faallooda ay ku tilmaameen Xulafada cadowga isku ah.
About The Author
