Warar dheeraad ah ayaa kasoo baxaya qarax aad u xooggan oo sarkaal sare lagula beegsaday deegaan katirsan gobolka Galguduud ee bartamaha Soomaaliya.
Qaraxa oo ka dhacay wadada laamiga ah ee xiriirisa degmooyinka Guriceel iyo Dhuusamareeb ayaa lagu beegsaday Jeneraal Odawaa oo ah taliyaha ciidamada melleteriga dowladda Federaalka.
Dad ku sugan deegaanka Ceeldheere ee duleedka Dhuusamareeb ayaa sheegay in ay maqleen jugta qarax aad uxooggan kadibna la arkay uuro madoow oo cirka isku shareertay.
War rasmi ah oo kasoo baxay Al Shabaab ayay ku sheegatay mas’uuliyadda qaraxa “Ugu yaraan Afar askari ayaa ku dhaawacantay qarax ay mujaahidiintu ku beegsadeen kolonyo gaadiid ah oo uu la socday Odawaa oo ah taliyaha ciidanka Kooxda Ridada” ayaa lagu yiri warka kasoo baxay Al Shabaab.
Ilo wareedyo ayaa sheegaya in si dirqi ah uu taliyaha ciidamada dowladda uga badbaaday isku dayga lagu doonayay in lagu dilo Odawaa balse waxaa qaraxa ku burburay gaari tiknika ah oo qeyb ka ahaa kolonyadii gelbinaysay jeneraalka.
About The Author
