Wararka saaka ka imaanaya magaalada Laascaanood ee xarunta gobolka Sool ayaa sheegaya in xaaladda magaalada ay saakay tahay mid yara deggan, balse waxay magaaladan xalay marti galisay dibadbaxyadii ugu xoogganaa, iyadoo maamulka ashahaada la dirirka ah ee Somaliland uu magaaladan ka jaray adeeggii korontada.
Maleeshiyaadka maamulka ashahaada la dirirka ee Somaliland ayaa dadka isku soo baxyada waday u adeegsanayay hubka culus iyo midka fudud, waxaana rassaasta maleeshiyaadkan ka dhashay khasaare kala duwan oo soo gaaray dadka rayidka ah.
Sheikh Axmed Girgire oo ka mid ahaa culimada magaalada Laas-caanood ayaa ka mid ahaa dadkii xalay ku dhintay isku dhacyada u dhaxeeya maleeshiyaadka hubeysan iyo dadka shacabka ah ee wada bannaanbaxyada ka dhanka ah maamulka ashahaada la dirirka ah ee Somaliland.
Maanta oo uu dibadbaxu galayo maalinkii 7-aad oo xiriir ah waxaa lagu wadaa in magaalada ay ka dhacaan dibadbax kale oo ka dhan ah maamulka uu fadhigiisu yahay Hargaysa.
About The Author
