Wararka ka imanaya dhulka Soomaali-galbeed ee Itoobiya ay xoogga ku haysato ayaa sheegaya xad-gudubyo hor leh oo lasoo darsay dadka xoolo-dhaqatada ah ee ku nool deggaannadaasi.
Sida ay xogtu tibaaxayso, ciidanka Xabashida Itoobiya ee deggan xerada Garab Case ee duleedka ee caasimadda Jigjiga, ayaa bilaabay in lacago hor leh oo baad ah ay ka qaadaan xoolo-dhaqatada.
Ciidamada Itoobiya oo dhibaato xooggan ku haya deggaannadaasi, ayaa sare u qaaday raafis xooggan oo ay ku hayaan wixii xoolaha shacabka, si ay uga qaadaan lacag baad ah oo ka badan intii hore.
Ilo-wareedyo xog’ogaal ah oo la hadlay qaar ka mida warbaahinta maxalliga ah ayaa sheegay in ciidanka Xabashidu ay dareersadeen isla markaana xaraysteen xoolo badan oo isugu jira Ari, Geel iyo Lo’.
Goob-joogayaashan la hadlay warfidiyeenka ayaa sidoo kale xaqiijiyey in ciidanka Xabashida Itoobiya ay lacago baad ah ka qaadeen dadkii iska lahaa xoolahan ay ku xaraysteen xerada millateriga ee Garab Case.
“Saddex Sac ayay aniga iga kaxaysteen, kadibna waxay yiraahdeen neefkiiba waxaad bixisaa 500 birr. Aniga hadda waxaa layga qaaday 1,500 birr.” Ayuu yiri qof ka mida dadkii lacagaha laga qaaday.
Isagoo hadalka sii wata ayuu sidoo kale yiri “Dadku way dhibban yihiin, xoolihii oo dhan ayaa lagu xareeyay meesha, lacag uunbaa lagu sii daayaa wixii u gacan-gala Xabashida”.
Tacaddiyadan sii laba-xaadsaday ayaa sidoo kale kusoo aadaya iyadoo usbuucyadii lasoo dhaafay boob iyo dhac baahsan ay ciidamada Itoobiya kula kacayeen hantida ganacsatada Soomaali-galbeed.
About The Author
