Wararka ka imanaya dhulka Soomaali-galbeed ee ku hoos-jiga gumaysiga Xabashida Itoobiya ayaa sheegaya boob baahsan iyo burcadnimo xarkaha goosatay oo ciidanka maamulka saliibiga ah ee Abiy Axmed ay ka geysteen deggaannadaasi.
Ciidamada Itoobiya, gaar ahaan kuwa loogu yeero Finaaska iyo sidoo kale maleeshiyaadka daba-dhilifka u ah ee Liyuu Booliska ayaa dhowrkii cisho ee u dambeeyey xoojiyey dhaca hantida shacabka ku dhaqan magaalooyin ay ka mid tahay Jigjiga oo ah xarunta deggaannada Soomaali-galbeed.
Ciidamadan oo sheegta inay la dagaallamaan Kootarabaanka, balse ficilladoodu ay ka turjumayaan inay u xilsaaran yihiin dhaca hantida Soomaali-galbeed, ayaa labadii maalmood ee lasoo dhaafay boobkii ugu xoogganaa ka geystay meherado ganacsi oo ku yaalla gudaha magaalada Jigjiga.
Guddi ay hoos-tagaan ciidamada Finaaska, ayaa bayaan ay maalinnimadii shalay soo saareen ku sheegay in ol’olihii ay wadeen maalmahan u dambeeyey kula wareegeen hanti ay ku qiimeeyeen bollaal milyan oo Birr, oo ah lacagta dowladda Xabashida Itoobiya.
Hantidan ay sida bareerka ah uga dhaceen shacabka muslimiinta ah ee Soomaali-galbeed ayay ku tilmaameen inay tahay mid kootarabaan ah, taas oo guddidani xaqiijisay inay kasoo qabteen magaalooyin ay ka mid yihiin Jigjiga iyo Mooyaale.
Warsaxaafadeedka guddidan qaabilsan dhaca hantida Soomaali-galbeed, ayaa lagu sheegay in ay ku guulaysteen, muddo hal todobaad gudihiis ah in gacanta ay ku dhigaan hanti qiimaheedu gaarayo 214 milyan oo Birr, una dhiganta lacag ku dhow milyan iyo afar boqol oo kun oo Doollar.
Jimcihii lasoo dhaafay ayay ahayd markii shacabka magaalada Jigjiga ay kusoo tooseen ciidanka Xabashida iyo maleeshiyaadka daba-dhilifka u ah ee Liyuu Booliska oo jabsanaya bakhaarrada iyo meheradaha waaweyn ee ku yaalla faras-magaalaha.
Ciidankan dhaca iyo boobka xooggan kula soo jarmaaday magaalada ayaa hantidii ay ka urursadeen meheradaha ka buuxsaday baabuur ay wateen, iyagoo dhanka kalena jir-dil xooggan u geystay isla markaana xabsiga u taxaabay dhowr iyo toban qof oo shacab ah.
About The Author
