Wararka ka imaanaya gobolka Galgaduud ee bartamaha Soomaaliya, ayaa sheegaya in 3 caruur ah oo isku qoys ahaa ay ku geeriyoodeen miyiga fog ee degmada Xeraale, kaddib markii haraadi miino ay kula qaraxday duleedka degmada Xeraale.
Waxaa la xaqiijiyay marka hore ay goobta ku geeriyoodeen laba caruur ah, halka qof saddexaad oo wiil ahaana uu dhintay isaga oo loola sii cararayo cisbitaalka degmada Xeraale.
Ilo wareed deegaanka ah ayaa xaqiijiyay in dhacdada ay timid markii ay caruurtu garaaceen walxo loo malaynayo haraadi miino oo miyiga fog ee Xeraale ku hartay, taasi oo keentay inay qarax samayso miinada.
Aabaha dhalay caruurta ayaa sheegay in saddex ka mid ah ubadkiisa oo laba ka mid ah ay gabdho ahaayeen midna uu wiil ahaa ay ku geeriyoodeen musiibadan ka dhacday Galgaduud, taas oo hadda ka dhigaysa in kaliya uu reerkaasi u haray hal wiil.
Caruurta dhacdadan qarax ah ku geeriyootay ayaa lagu kala magacaabi jiray Maxamed Cabdicasiis Maxamed, Nafiis Cabdicasiis Maxammed iyo Iqro Cabdicasiis Maxamed, kuwaas oo da’doodu u dhaxaysay lix jir ilaa laba sano jir.
Dhacdadan waxay kusoo beegmaysaa, xilli bishii lasoo dhaafay dagaallo xooggan oo dad badan ku dhinteen ay ka dhaceen deegaanno ka tirsan gobollada kala ah Galgaduud iyo Mudug, halkaas oo ay isku hayaan beelo walaalo ah oo ay hubka isugu dhiibeen maamullada ashahaada la dirirka ah ee halkaasi ka dhisan.
Hoos Ka Dhagayso Codka Aabaha Dhalay Caruurta.
About The Author
