Duullimaadyadii tooska ahaa ee u dhexeeyay Mogadishu iyo Nairobi ayaa si weyn u hakaday muddo laba maalmood ah, kaas oo boqolaal rakaab ah ku xannibay garoomada diyaaradaha ee Aadan-Cadde iyo Jooma Kenyaata iyo weliba xarumaha kale ee gobolka.
Hakadka duullimaadyadan oo Axaddii bilowday soona gaaray ilaa Isniintii shalay, ayaa la sheegay in ay sabaabeen shaqo-joojin ay sameeyeen shaqaalaha duulista ee Garoonka Jomo Kenyatta ee Nairobi, kuwaas oo ka cabanayay arrimo la xiriira shaqada iyo weliba mushaharka.
Sida ay wararku tibaaxayaan, shaqo-joojintan ayaa saameysay adeegyada dhulka iyo qaar ka mid ah howlaha muhiimka ah ee garoonka, taas oo keentay dib-u-dhac saacado badan ah, baaqashada duullimaadyo dhowr ah iyo isku dhex yaac dhinaca jadwalka ah.
Dhowr duullimaad ayaa maalin kasta caadi ahaan u kala goosha Muqdisho iyo Nairobi, waxaan rakaabka uu hakadkani samaynta xooggan ku yeeshay ka mid ah ganacsatada, shaqaalaha hey’adaha, dadka u socda arrimo caafimaad iyo kuwa u sii gudbaya dalal kale.
Rakaab badan ayaa wajahaya kharashaad dheeraad ah oo ku saabsan dhinaca hoteellada, cuntada, fiisooyinka iyo tigidhada beddelka ah. Qaar ayaa la sheegay damcay inay ku safraan waddooyin kale oo mara Itoobiya ama dalalka Khaliijka, kuwaas oo kharash qaali ah iyo waqti badan ku qaadanaya.
War maanta oo Talaado ah kasoo baxay Ururka Shaqaalaha Duulista Kenya (KAWU) ayaa si rasmi ah loogu shaaciyey in la soo afjaray shaqo-joojintan socotay muddada labada cisho ah, ee ay sameeyeen shaqaalaha duulista ee Garoonka Jomo Kenyatta.
Wasaaradda Gaadiidka Kenya iyo Ururka Shaqaalaha Duulista ayaa wada-jir qalinka ugu duugay heshiis shaqaalaha dib loogu celinayo shaqada, kadib is-afgarad ku-meel-gaar ah oo la sheegay in laga gaaray qaar ka mid ah cabashooyinkii shaqaalaha.
About The Author
