Ciidamo ka tirsan dowladda shiicada IIraan, ayaa lagu eedeeyay inay toogasho ka gaysteen deegaan ku teedsan xuduudda ay wadaagaan Pakistan iyo Iiraan, halkaas oo ay ku dileen dad u dhashay Pakistan.
Wakaaladda wararka ee Reuters oo soo xiganaysa saraakiil ka tirsan Pakistan ayaa sheegtay in ugu yaraan 4 qof oo Pakistaaniyiin ah la dilay, laba xubnood oo kalena ay dhaawacyo kala duwan soo gaareen, ka dib markii ciidamada shiicada Iiran ay rasaas ku fureen meel u dhow xadka gobolka Balochistan ee koonfur galbeed waddanka Pakistan.
Cumar Jamaali oo ah sarkaal ka tirsan ciidamada Pakistan, ayaa wakaaladda wararka ee Reuters u xaqiijiyay, in toogashadu ay ka dhacday mandiqadda Washok ee u dhow xadka ay wadaagaan Pakistan iyo Iiran.
Weerarka Iiraan ay ka gaysatay xuduuda ay la wadaagto Pakistan, ayaa kusoo beegmaya xilli uusan wanaagsanayn xiriirka ka dhaxeeya labadan dal, bishii Jannaayo ee ina dhaaftay ayay ahayd markii gantaallo ay is dhaafsadeen labadan dowladood, goobaha inta badan ay ka dhacaan isku dhacyada hubeysan ayaa ah deegaannada ay leeyihiin dadka suniyiinta ah ee kasoo jeeda labadaasi dal.
About The Author
