Gobolka Axmaarada ee dhaca waqooyiga wadanka Itoobiya waxaa weli ka soconaya dagaallada u dhaxeeya ciidanka millatariga xabashida Itoobiya iyo maleeshiyaadka jabhadda hubeysan ee Axmaarada, waxaa dhanka kale dagaallada dhulka ah ee u dhaxeeya labada dhinac hareer socda weeraro dhanka cirka ah.
In ka badan 20 xubnood ayaa la xaqiijiyay in lagu dilay weerar dhanka cirka ah oo ay gaysatay diyaarad nooca Drone-ka ah, taasoo beegsatay magaalo dhacda miyiga fog ee Wabar oo ah mandiqad dhacda Bariga Gojjam ee Gobolka Axmaarada.
Ilo wareedyo maxalli ah ayaa warbaahinta u sheegay in dadka ku dhintay duqeynta diyaaradeed oo isugu jiray ciidamo hubeysan iyo dad rayida lagu aasay kaniisad ku taal magaaladaasi, ilo wareedyada ayaa intaas kusii daray in diyaaradda inta aysan duqaynta gaysan ay indha indhaysay goobaha, kadibna dhowr gantaal la beegsatay bartilmaameedyada rayidka iyo maleeshiyaadka.
Weerarkan dhanka cirka ah ayaa dhacay Isniintii lasoo dhaafay oo ay taariikhdu ku beegnayd 27-ka Noofambar, balse xogtan ayay warbaahintu ogaatay saacado uun ka hor sababo ku aadan macluumaadka oo ah mid ay xaddiday dowladda Itoobiya.
Dhacdadan ayaa kusoo beegantay xilli weli dadka ku dhaqan magaaladaan aysan wali xusuustooda ka go’in duqayn diyaaradeed oo ay xaabashidu ka gaysatay isla magaalada bishii lasoo dhaafay ee Oktoobar, halkaas oo ay ku dhinteen in ka badan 13 qof oo rayid ah.
About The Author
