Degmada Beledxaawo ee gobolka Gedo waxay maanta markale marti gelisay iska hor’imaadyo u dhaxeeyay maleeshiyo ka wada tirsan murtadiinta, kuwaas oo la xiriira colaadda u dhaxayso maamullada Muqdisho iyo Kismaayo ee isku haya maamulka degmadaasi.
Dagaallada ayaa dib u qarxay duhurnimadii maanta, waxayna dhinacyadu isku adeegsadeen dagaalladii dhacay hubka noocyadiisa kala duwan, sida ay soo sheegeen ilo ka agdhow degmada Beledxaawo.
Inkastoo xaaladda degmadu ahayd mid colaadeed oo isgaariisnta maxalliga ah ay hawada ka maqnayd, ayaa haddana barqonimadii maanta waxaa mar qura hawada ka baxday isgaarsiinta magaalada Mandheera ee u dhow Beledxaawo, waxayna taasi keentay inay xaalad go’doon ah galaan dadka deegaanka oo waayay isgaarsiintii labaad ahaydna tan kaliya ee ay adeegsanayeen maalmihii lasoo dhaafay.
Waxay taasi keentay inay sidoo kale adkaato helidda xogta saxda ah ee dagaalka maanta dhacay, xiriiro aan la sameynay dadka deegaanka ayaa inoo sheegay in isgaarsiinta Mandheera ay dib usoo laabatay maqribnimadii caawa, isgaarsiinta Beledxaawo ayaase weli maqan.
Wararka qaar waxay sheegayaan in labada maleeshiyo ee dagaallamay aysan jirin goobo ay kala qabsadeen, khasaarahana si rasmi ah looma xaqiijin, wallow lasoo sheegayo inay jiraan khasaare dhaawacyo ah oo dhinacyada kala gaaray.
Dagaallada maanta dhacay ayaa ku biiraya dagaallo culus oo toddobaadkii 2-aad magaalada Beled-xaawo ku dhexmaraya maleeshiyada kooxda Riddada iyo kuwa maamulka Riddada Jubbaland, Gurguurte iyo Axmed Madoobe ayaa isku haya maamulka degmada, gurmadyo ayaa lasoo wariyay inay kala gaareen labada ciidan ee is hor-fadhiya, dadka deegaanku waxay sii wadaan inay magaalada ka barakacaan si ay naftooda u badbaadsadaan.
About The Author
