Bannaanbax ciidan oo aad u ballaaran oo galay maalintii Afraad ayaa si xiriir ah uga socda magaalooyinka waaweyn ee hoos-taga deggaannada uu ka arrimiyo maamulka ku-meel-gaarka ah ee gobolka Tigrey ee waqooyiga dalka Itoobiya.
Ciidamada ka amar-qaata maamulka uu Abiy Axmed usoo magacaabay gobolka Tigrey ayay wararku sheegayaan in ay xireen waddooyinka muhiimka ah ee gobolka kadib markii ay ka gadoodeen duruufo dhaqaale oo aad u daran oo soo wajahday sanadihii u dambeeyey.
Waxa weli xiran waddooyinka halbowlaha ah ee caasimadda maamulkaasi ee Maqalla, iyo sidoo kale jidadka waaweyn ee magaalooyinka Wukro iyo Adigrat. Iyada oo ciidamadan gadoodsani ay sidoo kale xayiraad buuxda saareen isku socodka jidka isku xira caasimadda Maqalla iyo magaalada Alamata.
Madaxweynaha Maamulka Ku-meelgaarka ah ee Tigray, Jeneraal Tadesse Werede, oo raba in uu xaaladda dejiyo ayaa si toos ah ula hadlay ciidamada, waxaanu baaq u diray bulshadda dadweynaha gobolkaasi, balse mudaharaaddadu ma aysan joogsan, waxaanay u muuqdaan in ay sii xoogaysteen.
Degmada Agula, oo qiyaastii 35 kiiloomitir waqooyi bari kaga beegan caasimadda Maqalla, ayaa sidoo kale isku-socodku uu kala xiran yahay, waxaanay ciidamada caraysani ay ka sanqariyeen in ay ka rajo-dhigeen xaaladda nololeed ee sii xumaanaysa iyo ballan-qaadyada beenta ah ee maamulkaasi.
Bannaabaxyadan ayaa kusoo aadaya xilli gobolka Tigrey uu ka jiro dhaqdhaqaaq xooggan oo colaadeed oo u dhexeeya maleeshiyaadka mucaaradka ee TPLF iyo ciidanka Xabashida Itoobiya. Halka ciidamada Eretriya iyo kuwa Itoobiyana ay qarka u saaran yihiin in ay ku dagaallamaan xuduudka labadaasi dal.
About The Author
