Ugu yaraan hal qof ayaa la xaqiijiyay in uu dhintay, halka kuwa kalena ay dhaawacyo kala duwan soo gaareen, kaddib weerar kooxo hubeysan ku qaadeen gaari bas ah oo kasoo baxay magaalada Mooyaale kuna jeeday dhanka Nairobi.
Wargayska The Star oo ka mid ah warbaahinnada Kenya ee dhacdadan tabisay ayaa sheegay in baabuurka Buska ah uu si gaar ah weerarku ugu qabsaday deegaanka Sololo ee hoostaga degmada Moayaale, waxaana mar qura rassaas la huwiyay gaarigaasi.
Ilo wareedyo uu wargaysku soo xiganayo ayaa sheegay in baabuurka la weeraray ay saarnaayeen ilaa 40 qof oo rakaab ah, kuwaas oo ku jeeday dhanka magaalada Marsabit, halkaas oo uga tallaabi lahaayeen dhanka magaalada Nairobi.
Ilaa 4 xubnood oo kale ayaa lasoo wariyay inay dhaawacyo kala duwan kasoo gaareen weerarka kooxaha hubeysan la beegsadeen baabuurka rakaabka ah, kuwaas oo la geeyay cisbitaalka Sololo, halkaas oo uu ku dhintay mid ka mid ah dhaawacyada, taasi oo dhimashada guud inta la xaqiijiyay ka dhigaysa laba xubnood.
Warbaahinta Kenya, waxay sheegtay in aanan si rasmi ah loo aqoonsan kooxaha ka dambeeyay weerarkaasi, balse booliska ayaa laga soo xigtay inay tuhmayaan burcadda hubeysan ee dilalka iyo dhaca ka gaysanaya ismaamulka Marsabit ee Kenya, si gaar ah aagga deegaannada ku dhow magaalada Mooyaale.
Laba toddobaad uun ka hor ayay ahayd markii weerar hubeysan oo ka dhacay isla ismaamulka Marsabit oo lagu beegsaday gaari ay dad rakaab ah la socdeen lagu dilay ugu yaraan siddeed qof, halka kuwa kalena lagu dhaawacay.
Kooxaha burcadda ee Booliska Kenya ku eedaynayo weeraradan ayaa sidoo kale Mooyaale iyo nawaaxigeeda ku beegsada saraakiisha ciidan ee ammaanka Kenya iyo sidoo kale ciidamada hubeysan ee Booliska ka tirsan.
About The Author
