Khasaare nafeed iyo mid maaliyadeed oo xoogan ayaa ka dhashay shil culus oo maanta ka dhacay qaybo ka mid ah gobolka Eastern Cape ee ka tirsan waddanka Koonfur Afrika.
Ugu yaraan 14 qof ayaa la xaqiijiyay inay ku dhinteen shilkan baabuur oo u dhaxeeyay gaari nooca takaasida yar ee dadweynuhu raacaan iyo gaari kale oo noociisu yahay Suv.
Shilka ayaa laga soo tabiyay waddada N9 ah oo kutaalla gobolka Eastern Cape ee dalka Koonfur Afrika, waxaa sidoo kale shilkaasi ku dhaawacmay 11 xubnood oo ka mid ahaa dadkii saarnaa gaariga Taxi-ga, kuwaas oo la geeyay cisbitaalka deegaanka.
Unathi Binqose, oo ah afhayeenka waaxda gaadiidka ee gobolka Eastern Cape ayaa warbaahinta maxalliga ah u sheegay in gaariga SUV-ka ah oo ay saarnaayeen 6 qof iyo midka taksiga ay isku dhaceen, 6-da qof ee la socotay gaariga Suv-ka ayaa goobta ku wada dhintay, halka toddobo kale oo la socotay gaariga kalena ay goobta ku dhinteen, qofka 14-aad ayaa u dhintay goor dambe ee maanta dhaawacii soo gaaray.
Waddanka koonfur Afrika, waxaa bishan December laga diiwaan geliyay shilal gaadiid oo dhowr ah, kuwaas oo ay ku nafwaayeen dadyow badan, dareewallada kaxeeya gaadiidka dadweynaha ayaa lagu eedeeyay inay xawaare sare ku wadaan gawaarida, taasi oo badanaa keenta inay gorada isla galaan gaadiidka.
About The Author
