Inta la hubiyay ugu yaraan laba qof ayaa ku dhintay daad ku qaaday mid ka mid ah xaafadaha magaalada Hargaysa ee gobolka waqooyi galbeed Somalia, halkaas oo saacadihii lasoo dhaafay uu ka da’ay roob xooggan.
Dhacdada ayaa lasoo wariyay inay si gaara uga dhacday waaxda Maxamuud Haybe ee magaalada Hargaysa, waxaana daadku qaaday gaari noociisa lagu sheegay Hilux oo ay wateen labada xubnood ee geeroyooday.
Ehellada labadan qof ee daadku qaaday ayaa sheegay in lagu kala magacaabi jiray Maxamed Sitiin Xaaji Cabdi iyo Muuse Cabdillaahi, kuwaas oo ka kala yimid dalalka Maraykanka iyo Kanada oo ay degganaayeen.
Ehelladu waxay sidoo kale sheegeen in la helay maydka Maxamed Sitiin Xaaji Cabdi, halka weli baadi-goob loogu jiro maydka qofka 2-aad ee uu daadku ku qaaday magaalada Hargaysa.
Dhinaca kale, laba wiil oo arday ah ayaa lasoo wariyay in ay geeriyoodeen kaddib markii uu liqay dooxa weyn ee magaalada Hargaysa.
Labada arday ee dhintay ayaa lasoo wariyay inay ku dabaalanayeen dooxa liqay, ugu dambayna halkaas ku geeriyoodeen.
About The Author
