Kooxda Riddada Soomaaliya ee garwadeenka uu ka yahay Xasan Gurguurte ayaa si adag uga hor-tagay mudaharaad ay mucaaradku soo abaabuleen oo la filayay in saaka oo Axad ah uu ka bilowdo magaalada Muqdisho ee caasimadda waddanka Soomaaliya.
Bannaanbaxan oo mucaaradku ay sheegeen in looga soo hor-jeedo boobka iyo barakicinta ay kooxda Gurguurte ka waddo magaalada Muqdisho, ayaa u muuqda mid fashilmay ama aan u dhicin ugu yaraan sidii ay ballantu ahayd.
Maleeshiyaad fara badan oo wata gaadiid dagaal iyo hub culus ayaa lagu daadiyey xaafadaha magaalada, waxaanay xireen waddooyinka muhiimka ah, iyadoo qaarkood-na la geeyey goobihii laga barakiciyey shacabka.
Sidoo kale maleeshiyaad aad u hubaysan oo wata gaadiidka gaashaaman ayaa lagu horgooyey guryihii ay deggenaayeen hoggaanka mucaaradka oo ay ka mid yihiin muradiinta kala ah Shariif Sheekh, C/Raxman C.Shakuur, C/Kariim Guuleed iyo Cabdi Qaybdiid.
Waxa kale oo jira in murtadiin ay ka mid yihiin Xasan Cali Khayre, Maxamed Xuseen Rooble iyo C/Raxmaan Caynte oo iyaguna isku dayay inay guryahooda kasoo baxaan ayaa lagu hor-jaray gawaari hubaysan waxaana lagu amray in guryahooda ay dib ugu laabtaan.
Shariif murtad oo saaka la hadlay warbaahinta ayaa sheegay in 5 saac la isugu yimaado garoonka Koonis, oo ah goobta kaliya ee maamulka Gurguurte ogol yahay in mucaaradku ay ku qabsan karaan bannaanbaxyada.
Fulinta go’aankan ayaa mar kale fashilmay, kadib markii ay mar kale hor-is-taag ku samaysay kooxda Gurguurte, waxaase jira dibad-baxyo kooban oo aroortii hore ee saakaba ka bilowday degmada Dayniile, halkaas oo ay isugu soo baxeen dadka rayidka ah ee ku nool degmadaasi.
Maleeshiyaadka Gurguurte ayaa isla markiiba weeraray goobtii uu mudaharaadku ka socday, waxaanay rasaas huwiyeen dadkii shacabka ahaa ee bannaanbaxayay, ilo-wareedyo ayaa sheegaya in askarta riddadu ay halkaasi ku dileen ugu yaraan 1 qof oo shacab ah, saddex kalena ay ku dhaawaceen.
Si kastaba ha ahaatee, xaaladda caasimadda Muqdisho weli waa mid kacsan, welina mucaaradku waxay sheegayaan in aanay quusan oo ay dhigayaan bannaanbaxyada, balse kooxd Gurguurte ayaa iyaduna dhankeeda isku dayaysa inay awood ku muquuniso kooxaha kasoo hor-jeeda.
About The Author
