Waziirka arrimaha dibadda ee dowlada Mareykanka Antony Blinken oo dowaladdiisu walaac xooggan ka muujinayso isdilka u dhaxaysa dadka xabashida ah, ayaa ku baaqay in la dajiyo xaaladda colaadeed ee ka holceysa gudaha waddanka Itoobiya.
Warasaxaafadeed kooban oo kasoo baxay xafiiska wazaaradda arrimaha debadda ayuu Blinken si gaar ah ugu baaqay in gobolka Tigreegga laga saaro ciidamadii soo galay, xilligii lala dagaalamayey jabhadda TPLF.
“Ciidanka Eritrea waa in ay si buuxda uga baxaan Itoobiya, Eritrea iyo Itoobiya waa in ay ka fogaadaan daandaansiga, ayna ixtiraamaan madax-bannaanida iyo wadajirka dhuleed ee dalalka gobolka oo dhan” ayuu yiri Antony Blinken.
Warsaxaafadeedka kasoo baxay wazaaradda arrimaha debadda ee xukuumadda Washington, ayaa lagu soo aadiyay sannad guurada markii uu dhacay heshiiskii u dhaxeeyay dowladda Itoobiya iyo jabhadda hubeysan ee TPLF, kaasi oo lagu gaaray magaalada Pretoria ee waddanka Koonfur Africa.
Antony Blinken ayaa sidoo kale soo hadal qaaday xasuuqa ka socda gudaha dalka Itoobiya, kaas oo lagu beegsanayo buu yiri dadka shacabka ah ee aanan ku lugta lahayn colaadda u dhaxaysa dhinacyada.
Wuxuu si gaar ah u xusay inay ka xunyihiin isdilka xabashida ee ka socda gobolka Axmaarada iyo gobollo kale, isagoo ku baaqay in la joojiyo colaadda u dhaxaysa xabashida.
About The Author
