Chakahola waa deegaan ka tirsan ismaamulka Kilifi ee dhaca bariga waddanka Kenya waxaa tan iyo bishii hore laga soo daadguraynayay bakhtiyada gaalo Kenyaan ah oo uu haadaan ka tuuray baadarigooda, ka dib markii uu ammar ku siiyay inay cuntada ka soomaan si ay u dhintaan ka dibna ay jannada u galaan.
Dowladda saliibiyadda ah ee Kenya oo dedaal badan ku bixisay sidii ay usoo afjari lahayd daabullidda maydadka dadka Kenyaanka ah ee lagu qanciyay inay af xirtaan illaa ay ka dhintaan ayaa sheegtay in maydadka lagu guuleystay in gacanta lagu dhigo illaa imika ay gaarayaan inka badan 200 oo Kenyaan ah.
Saraakiil ciidan oo ka tirsan dowladda Kenya ayaa sheegay in kooxaha baadigoobka ugu jira diiwan gelinta dadka u dhintay dhacdadan yaabka leh ay kaynta Chakahola ee waddankaasi Kenya ay saacadihii u dambeeyay kasoo saareen maydadka 22 qof oo hor leh.
Tirakoob ay soo saartay dowladda Kenya ayaa lagu sheegay in marka lagu daro 22-ka qof ee maydadkooda la helay ay wadarta dadka Kenyanka ah ee u dhintay cunta ka soomidda ay gaareen 201 qof.
“Kooxdeena dambi baarista waxay maanta soo saareen 22 mayd ah, balse nalooma sheegin dad ka badbaaday,” waxaa sidaas warbaahinta ku tiri Rhoda Onyansha oo ah sarkaal maxalli ah.
Waxay sidoo kale sarkaaladdan Kenyaanka ah sheegtay in sidoo kale la xiray qof kale oo la tuhunsan yahay, taas oo tirada guud ee maxaabiista dhacdadan lala xiriirinayo ka dhigaysa 26 qof.
Maydadkan labaatan iyo labada qof ee laga soo saaray kaynta Chakahola, waxa ka horeeyay 29 kale oo maydadkooda isla kayntan laga helay jumcihii lasoo dhaafay, waxaana 29-kaasi qof ku jiray meydadka 12 carruur ah, kuwaas oo laga soo saaray hal xabaal.
Paul Mackenzie, oo ah hoggaamiyaha kaniisadda caalamiga ah ee Good News, ayaa xuddun u ah dhacdooyinka isdilka ah ee ay ku kacayaan dadka Kenyaanka ah, kadib markii uu dadkiisa ku amray inay cuntada ka soomaan si ay u dhintaan ka dibna janada u galaan, Baadarigan oo ay dowladda Kenya xirtay billowgii dhacdooyinka ayaa dib looga siidayay xabsiga dhowaan, sida ay shaacisay maxkamadda sare ee waddankaasi Kenya.
About The Author
