Wararka ka imaanaya mandiqadda barakaysan ee Shaam ayaa sheegaya in saaka oo Axad ah kooxaha mucaaradka ah ee hubeysan ay gacanta ku dhigeen magaalada Dimishqa ee caasimadda u ah Suuriya, halkaas oo ay ka eryadeen maamulkii uu majaraha u hayay dhiig-yacabka Bashaar Al-asad.
Kooxaha mucaaradku waxay ku dhawaaqeen inay gacantooda ku dhacday magaalo madaxda dalkaasi, si rasmi ahna ay u rideen nidaamkii Bashaar Al-asad uu hoggaanka u yahay.
Saraakiil ka tirsan ciidankii burburay ee nidaamka Nureysiga ayaa Reuters u sheegay in Bashaar Al-asad diyaarad gaar ah uu ka qaatay caasimadda, una baxsaday meel aan si rasmi ah loo ogayn.
Mucaaradku waxay xalay shaaciyeen inay lasoo wareegeen mudo 24 saac gudahood ilaa afar magaalo oo kala ah, Darcaa, Quneydara, Suweyda iyo Ximis oo ah magaalada saddexaad ee ugu wayn Suuriya, waxay na saaka ku qaabariisteen oo ay gacanta ku dhigeen magaaladii ugu dambeysay ee caasimadda u ah Suuriya ee Dimishqa.
Xoogagga mucaaradku waxay sheegeen inay la wareegeen xarumaha raadiyaha iyo telefishanka rasmiga ah ee dowladda iyo sidoo kale xarunta madaxtooyada caasimadda Dimashqa.
Qoraal kasoo baxay saaka oo Axad ah kooxaha mucaaradka Suuriya ayaa lagu yiri “Shacabka xorta ah ee Suuriya waxay rideen Bashaar al-Assad.”, duulimaadyadii garoonka diyaaradaha caalamiga ah ee Dhimishqa ayaa la joojiyay, shaqaalihii madaarkaasi ayaa sidoo kale la kala diray.
Ciidankii burburay ee Nidaamkii Nuseyriga Bashaar Al-asad ayaa billaabay isku dhiibaan kooxaha hubeysan mucaaradka ah sida laga soo xigtay ilo ka tirsan kooxaha mucaaradka ah ee la wareegay gacan ku haynta dalka Suuriya.
Debaal degyo iyo isku soo baxyo waawayn ayaa ka billowday caasimadda Suuriya, sawirro lagu faafiyay baraha bulshada ayaa muujinayay shacabka oo dibadda isugu soo baxay, si ay u muujiyaan farxaddooda, magaalooyinka kale ayay dabaal-degyo ka billowdeen.
Suuriya ayaa martigelisay 10 maalmood oo halgan gumeysi diid ah, kaasi oo ugu dambayn keenay in uu dumo nidaamkii mujrimka ahaa ee Bishaar Al-asad uu majaraha u hayay.
About The Author
