Fal si weyn looga argagaxay ayaa duhurnimadii shalay ka dhacay magaalada Shreveport ee gobolka Louisiana, ee dalka Mareykanka, kadib markii nin u dhashay waddankaasi oo magaciisa lagu sheegay Shamar Elkins uu qudha ka jaray 8 caruur ah.
Toddobo ka mid ah carruurtan geeriyootay waxaa la xaqiijiyey in uu dhalay ninka falka geystay, halka cunugga siddeedaad uusan qaraabo la ahayn. Waxaanay xogtu ay intaasi ku daraysaa in ubadkan ay da’doodu u dhaxaysay 1 ilaa 14 sano jir.
Hooyada carruurta dhashay iyo haweenay kale ayaa lasoo weriyey in xaalad halis ah ay ku jiraan, ka dib markii iyagana uu rasaas oodda kaga qaaday. Sidoo kale, cunug sagaalaad ayaa ka badbaaday tareesadaasi, isagoo ka booday dusha sare ee dhismaha, kaas oo isna la dhigay cisbitaalka.
Ninkan hubeysan ayaa la xaqiijiyey in markii uu rasaasta ku furay qoyskiisa uu isku dayay in uu ku baxsado gaari uu soo xaday, balse ciidanka booliska ayaa in muddo ah baacsanayay, waxaanay ugu dambayntii ay ku guulaysteen in isagana ay khaarajiyaan.
Maamulka magaalada iyo booliska ayaa dhacdadan ku tilmaamay mid ka mid ah kuwii ugu xumaa ee abid soo mara Shreveport, iyadoo loo diiwaangeliyey inay tahay toogashadii ugu dhimashada badneyd ee hal qoys ku habsata oo Mareykanka ka dhacda tan iyo bilowgii 2024.
Booliska ayaa falkan ku sifeeyey mushkilada qoys, waxaanay mas’uuliyiinta deggaanku ay sheegeen in dambiyada la xiriira arrimaha qoysku ay aad ugu soo kordheen magaalada. Iyagoo dhanka kalena tilmaamay in dhacdadani ay bulshadu ka reebi doonto saamayn xooggan.
About The Author
