Wararka ka imaanaya dalka Suudaanta Koonfureed ayaa sheegaya in kooxo hubeysan ay dhexda u galeen kolonyo gaadiid ah oo ku socdaalayay mid ka mid ah marinnada muhiimka ah ee la isaga kala goosha gobollada dalkaasi, halkaas oo ay ku badanyihiin dilalka, dhaca dadweyne iyo afduubka ay ka gaystaan kooxahaasi.
Warbaahinta maxalliga ah ee South Sudan ayaa sheegtay in mid ka mid ah weeraradaasi lagu beegsaday gaari uu watay qof kasoo jeeda Somalia, kaas oo ay sheegtay in isla goobta lagu dilay, halka la gubay gaarigii uu watay.
Afhayeen u hadlay ciidanka loogu yeero difaaca dadweynaha ee South Sudan ayaa sheegay in weerarka lagu beegsaday qofka kasoo jeeda Soomaaliya uu dhacay toddobaadkii hore, qaybna uu ka yahay weeraro uu ku eedeeyay inay ka dambeeyaan mucaaradka hubeysan.
Afhayeenka ayaa sheegay in maleeshiyada mucaaradku ka dambeeyeen ilaa laba weerar oo ka dhacay waddada muhiimka ah ee Juba-Terekeka, kuwaas oo uu tilmaamay inay sababeen dhimashada dad ku safayay jidkaasi dheer iyo afduubka dad kale.
Sarkaalkan oo lagu magacaabo Lul Ruai Koang ayaa qayb ka mida warkiisa ku yiri “Gaariga ayaa si lama filaan ah loo weeraray kadibna waa la gubay. Nasiib darro, waxaana taasi ka dhashay in hal qof Soomaali ah uu ku dhinto weerarka,” ayuu yiri.
Suudaanta Koonfureed waxay ka mid tahay waddamada qaaradda Africa ee ay ka shaqaystaan bulshooyinka Soomaaliyeed, waxayna qayb ka noqdaan ganacsatada dilalka iyo afduubka loogu gaysto dalkan, maadaama waddada lagu dilay qofka kasoo jeeda Somalia ay aad ugu badan yihiin kiisaska dhaca iyo dilalka ka dhanka ah socotada iyo ganacsatada.
Dhanka kale isagoo sii hadlayay ayuu sarkaalkan intaas ku daray in kooxaha mucaaradka ay sidoo kale beegsadeen gaari ganacsi oo ay saarnayd 30-tan, kaasi oo kusii jeeday dhanka degmada Gok-Machar ee dhacda gobolka Aweil North, wuxuu dhanka kale ka dhawaajiyay in kooxdan fulisay weerar kale oo ay ku beegsatay gaari siday lix qof, kuwaas oo ay afduubteen, dableyda ayuu tilmaamay inay dadka u kaxeeyeen dhanka saldhigga ay leeyihiin.
Ilaa 4 qof ayuu sheegay inay soo badbaadiyeen kaddib howlgal ay aaggaas ka sameeyeen, dadka la helay ayuu sheegay inay u kala dhasheen hal qof oo kasoo jeeda dalkiisa South Sudan, halka saddexda kalena ay kasoo jeedaan dalka ay jaarka yihiin ee Suudaan.
About The Author
