Daadad ka dhashay roobab mahiigaan ah ayaa kusoo rogmaday xaafado ka tirsan magaalada Nairobi ee caasimadda Kenya iyo magaalooyin kale oo ka tirsan dalka Jabuuti, kuwaas oo sababay dhimashada ugu yaraan siddeed xubnood oo mid ka mida uu yahay sarkaal Kenyaan ah, halka dadka kalena ay yihiin dad shacab ah oo kasoo kala jeeda labadaasi dal.
Inta la xaqiijiyay daadadka xooggan ee ka dhashay roobab mahiigaan ah ee ka da’ay xaafadda Kamukunji ee Nairobi waxaa ku dhintay sarkaal ka tirsan ciidanka booliska dowladda Kenya, halka saddex kale oo rayid ah oo u dhashay dalkaasina ay ku kala dhiteen daadad kusoo rogmaday xaafadaha Gigiri, Dagoretti iyo Buruburu.
Dhanka kale, Roobab mahiigaan ah oo ka da’ay waddanka Jabuuti, gaar ahaan mandiqadda Carta ayaa lasoo wariyay inay la tageen oo ay qaateen ugu yaraan 4 caruur ah, kuwaas oo la wariyay inay ku jeedeen iskuul ay wax ku bartaan, goobjoogeyaal ayaa xaqiijiyay in aanan weli la helin maydadka carruurtaasi.
Sidoo kale, roobabkan ayaa lasoo wariyay inay ka da’een deegaanno dhowr ah oo ka tirsan Jabuuti, waxay si gaar ah u saameeyeen waddada isku xirta caasimadda Jabuuti iyo magaalada Tajuura, waxaana roobabkaasi ay sababeen in uu hakad galo isku socodka dadka iyo gaadiidka wadadaasi.
About The Author
