Dowladda Suudaan, ayaa shaacisay inay u yeertay safiirkeeda u fadhiya Addis-ababa, kaddib markii ay Itoobiya ku eedeysay faragelin toos ah oo ay ku sameysay gudaha dhulkeeda.
Xukuumadda Khartuum, waxay Itoobiya iyo Imaaraadka Carabta si wadajir ah ugu eedeysay inay ku lug leeyihiin weeraro loo adeegsaday diyaarado Drones ah oo beegsaday garoonka diyaaradaha caalamiga ah ee Khartuum.
Muxiyadiin Saalim, oo ah wasiirka arrimaha dibadda Suudaan, ayaa shir jaraa’id oo uu qabtay ku sheegay in safiirkooda Addis-ababa Azeyn Ibrahim loo yeeray, sababo la xiriira gardarrada weerarka Drone ee Imaaraadka iyo Itoobiya kusoo qaadeen buu yiri garoonka Khartuum.
Caasim Cawd Cabdulwahaab, oo ah afhayeenka rasmiga ah ee ciidanka Suudaan, ayaa sheegay in diyaaradaha aan duuliyaha lahayn ay ka soo duuleen garoonka magaalada BahirDar ee Itoobiya, isla markaana fuliyeen weeraro cadawtinnimo ah oo ka dhacay gudaha hawada Suudaan sida uu sheegay.
Wuxuu intaas ku daray in diyaaraduhu beegsadeen goobo militari iyo rayid, oo uu ku jiro garoonka diyaaradaha caalamiga ah ee Khartuum, difaaca cirka ayuu sheegay in uu soo riday mid ka mid ah drones-ka 17-kii Maarso, baaritaan lagu sameeyay na lagu ogaaday inay leedahay Imaaraadka, lagana isticmaalay gudaha Itoobiya, weerarkan ayuu ku tilmaamay gardarro toos ah oo ka dhan ah madaxbannaanida Suudaan, kana aamusi doonin.
About The Author
