Madaxweynaha dowladda Saliibiyadda Maraykanka Gaal Donald Trump ayaa saacado ka hor ku dhawaaqay in la kordhiyay xabbad-joojinta ilaa ay Iiraan ka soo bandhigayso ayuu yiri soo jeedinteeda isla markaana la dhammaystirayo wada-hadallada.
Trump waxa uu caddeeyay inuu faray ciidamada qalabka sida ee Maraykanka inay sii wadaan go’doominta isla markaana ay ku jiraan heegan buuxa, isagoo sheegay in go’aankani uu yimid sababo la xiriira waxa uu ku tilmaamay kala qaybsanaan xooggan oo ka jirta gudaha Iiraan, iyo sidoo kale codsi ka yimid dhexdhexaadiyaha Pakistan oo ku baaqay ayuu yiri, in dib loo dhigo weerar kasta oo ka dhan ah Iiraan.
Dhanka kale, la-taliyaha guddoomiyaha baarlamaanka Iiraan ayaa sheegay in kordhinta xabbad-joojinta ee Trump “aysan lahayn wax macno ah”, isagoo adkeeyay in dhinaca laga adkaaday uusan shuruudo ku soo rogi karin dhinacii adkaaday.
Waxa uu intaas ku daray in sii wadidda go’doomintu ay la mid tahay duqayn isla markaana ay u baahan tahay jawaab militari, isagoo xusay in waqtigan hadda la joogo loo baahan yahay Iiraan inay gacanta ku dhigto majaraha dagaalka.
Arrintan ayaa imanaysa kadib markii madaxweyne-ku-xigeenka Maraykanka uu baajiyay safar uu ku tegi lahaa Pakistan, halka Iiraan ay shuruud uga dhigtay qabsoomidda wada-hadallada, in marka hore la joojiyo siyaasadda isugu jirta cadaadiska iyo hanjabaadaha ee ay waddo Washington.
Wakaaladda Wararka Tasnim, oo xiriir la leh Ciidanka Ilaalada Kacaanka Iran ayaa ka soo xigatay ilo-wareedyo sheegaya in Tehran ay si buuxda ugu diyaarsan tahay suurtagalnimada dib u bilaabashada dagaalka, isla markaana ay haysato qorshayaal cusub oo ku saabsan wareegga xiga ee dagaalka.
Waxa kale oo la sheegay in Iiraan ay toddobaadyadii la soo dhaafay filaysay suuragalnimada dagaalka oo dib u qarxa, qaybo ka mida qalabkeeda millateriga ay u rartay goobo muhiim ah, isla markaana ay soo sahansantay bartilmaameedyo cusub oo ay doonayso in ay beegsato.
Sidoo kale warbaahinta Tasnim waxay sheegtay in sii wadidda xannibaadda badda ay ka dhigan tahay sii socoshada colaadda. Iyadoo intaas ku dartay in muddada go’doomintu ay sii jirto, ay sidoo kale Iiraan sii laba-jibbaari doonto xayiraadda marin-biyoodka Hormuz. Waxa kale oo Tasmin ay ku dhawaaqday in sidoo kale Iran ay diyaar u tahay in xoog ay ku jebiso go’doominta Maraykanka.
Ciidanka Ilaalada Kacaanka Iiraan ayaa habeennimadii xalay bartamaha magaalooyin ay ka mid yihiin Tehran, Shiraz, Tabriz iyo Zanjan kusoo bandhigeen gantaallada riddada dheer ee Plastic-ka, xilli ay socdeen isu soo baxyo waaweyn oo lagu taageerayo xukuumadda Iiraan.
Hadalada Trump ee dagaalka la xiriira ayaa marar badan isa soo bed-bedelayay. Laba toddobaad ka hor ayuu hanjabaad culus oo aflagaado ku jirto u jeediyay Iiraan, halka haddana dhowr jeer oo kale uu muujiyay inuu doonayo in la joojiyo colaadda iyo hubanti la’aanta suuqyada.
Ku dhawaaqistiisa cusub ee soo yeertay saacado ka hor, ayuu Trump mar kale kaga laabtay hanjabaado uu maalmahan u dambeeyey jeedinayay, isagoo sheegaya in haddii xabad-joojintu dhammaato, heshiis-na la gaari waayo uu duqeymo culus ku bilaabi doono xarumaha korontada iyo buundooyinka Iiraan.
Saacado ka hor ku dhawaaqistiisa, saliibigan horjoogaha ka ah Maraykanka Donald Trump ayaa goodinaayay, isagoo u sheegay telefishinka CNBC inuusan jeclayn inuu sii wado xabbad-joojinta ku-meel-gaarka ah, isagoo carrabka ku adkeeyey in ciidanka Mareykanka ay diyaar u yihiin dagaal.
Si kastaba ha ahaatee, xabbad-joojintan u dambaysay ee uu ku dhawaaqay ayaa ah mid dhinaciisa oo kaliya ku kooban, iyadoo falanqeeyayaashu ay laba-boglaynta Trump ku sifeeyeen mid muujinaysa in xaalku uu ku xun yahay maamulka saliibiga ah ee Washington.
About The Author
